Çaste të frikshme që dukeshin të pambarimta për një familje italiane e cila u sulmua në banesë nga një grabitës i cili në përpjekje për të realizuar plaçkitjen i vuri edhe thikën në fyt vogëlushit 10-vjeçar duke e terrorizuar. I dyshuari i ngjarjes është një 31 vjeçar shqiptar, ai është Emilijan Shelnaj. Familja, banuese në lokalitetin Abano Terme të rajonit Padova në Itali, u përball me agresorin e dhunshëm dhe rrëfen minutat e ngjarjes. I riu shqiptar është arrestuar në flagrancë gjatë tentativës së grabitjes me dhunë në vilën e familjes italiane.
Emiljan Shelnaj, 31 vjeç, hyri në shtëpinë e familjes me katër anëtarë, prindërit dhe djali 10 vjeç e vajza 15 vjeçe. Familjarët u zgjuan dhe vrapuan për të parë se çfarë po ndodhte në kuzhinë. Shqiptari në moment kapi fëmijën 10-vjeçar të çiftit dhe i vuri në fyt thikën që mbante në dorë.
Ishte pikërisht babai ai që dëgjoi i pari zhurmat dhe vrapo andej nga vinin, por agresori u tregua më i shpejtë dhe rrëmbye fëmijën. Emiljani nuk e kishte vënë re që çifti kishte edhe një vajzë tjetër, 15 vjeçe, e cila doli menjëherë nga shtëpia dhe telefonoi policinë. Karabinierët e zonës shkuan shpejt në vendngjarje, dhe agresori i surprizuar nga policët, lëshoi për një moment fëmijën, dhe pikërisht atë kohë, karabinierët e neutralizuan dhe arrestuan 31-vjeçarin pa rezistencë.
Djali 10 vjeçar u dërgua në spital për shkak të gjendjes së shokut që kaloi. E gjitha familja është mirë, raportojnë mediat italiane. Ata theksojnë faktin se gatishmëria dhe gjakftohtësia e vajzës 15-vjeçare bëri që policia të mbërrinte menjëherë duke kapur në flagrancë hajdutin dhe shpëtuar të gjithë familjen.
