Tre persona janë kapur në Tiranë me armë pa leje dhe të akuzuar për shpërndarje të lëndëve narkotike.
Nga efektivët e komisariatit Nr. 1 u bë arrestimi në flagrancë i shtetasit R. Ll., 18 vjeç, pasi në fshatin Shpat Rovë, Tiranë, u kap duke qarkulluar me një armë zjarri pushkë që e mbante të fshehur në një thes.
Ndërkohë, nga efektivët e komisariatit Nr. 5 u bë arrestimi në flagrancë i V. K., 24 vjeç dhe R. Ç., 30 vjeç, si dhe u referuan materialet për shtetasin K. D., pasi në Bathore, në rrugën “Demokracia”, në lokalin në pronësi të shtetasit V. K., shtetasit R. Ç., dhe K. D., janë konstatuar duke pirë kokainë, e cila u sekuestrua në cilësinë e provës materiale.
Gjithashtu, gjatë kontrollit në banesën e shtetasit R. Ç., 30 vjeç, policia gjeti dhe sekuestroi në cilësinë e provës materiale një armë zjarri automatik.
Ndaj të dyshuarve materialet iu referuan Prokurorisë Tiranë, për veprime të mëtejshme në ngarkim të shtetasit B. Ll., për veprën penale “Armëmbajtja pa leje”, në ngarkim të shtetasit R. Ç., për veprat penale “Armëmbajtja pa leje” dhe “Prodhimi dhe shitja e narkotikëve, dhe shtetasin V. K., për veprën penale “Përshtatja e lokalit për përdorim droge”.
/a.r
