Ish-kryebashkiaku i Vlorës, Shpëtim Gjika, ka postuar disa foto në profilin e tij në “Facebook”, në të cilat shpreh shqetësimin për fotografinë e tij, të cilin ia kanë hequr nga ambientet e Bashkisë.
Ai shkruan se fillimisht ka menduar se ky veprim mund të ishte një lapsus, por edhe sot, shton ai, fotografia e tij mungon. Gazeta ‘Sot’ raporton se ai nuk ka ngurruar që këtë shqetësim që ka, ta krahasojë me kohën e diktatorit Enver Hoxha, duke thënë se edhe sot në kohën moderne, vazhdoka e njëjta histori.
“Ka disa ditë që nga ambientet e Bashkisë Vlorë, në radhën e kryetarëve që e kanë drejtuar këtë institucion, është hequr fotografia ime! Fillimisht e mendova si një lapsus, dhe prita te korrigjohej! Gjë që as sot nuk ndodhi! Nuk është mungesa e fotos time gjëja që më shqetëson më së shumti! Por, historia mbetet histori! E mirë apo e keqe qofte ajo, askush nuk ka të drejtë të retushojë, falsifikojë, apo me keq akoma ta fshijë atë! Kisha menduar se kjo lojë e fëlliqur kishte marrë fund bashkë me kohën e vjetër! Për fat të keq qënkam gabuar! Edhe sot, në kohën moderne të demokracisë, vazhdoka e njëjta histori! P.S: është e ndaluar, për arsye sigurie, të bëjnë like punonjësit e bashkisë! Madje edhe kushdo tjetër që punon në administratë, mire do jete ta anashkalojnë këtë status”, shkruan Gjika në profilin e tij në Facebook.
