Për Ilir Alimehmetin, i cili ishte i pranishëm sot në takimin e foltores së Ervin Salianjit në Durrës, ku mbajti edhe fjalim, PD ka nevojë për ndryshim.
I ftuar në emisionin ‘Repolitix’ në Report Tv, ai tha se PD duhet të shtohet në ide dhe në njerëz.
‘Unë fjalimet i mbajë të shkurtra në këto raste mesazhi është i rëndësishëm dhe mesazhi është mesazh bashkimi, bashkim njerëzish. Unë them se PD ka nevojë për tu shtuar në ide dhe në njerëz. Mund të kemi edhe mendime ndryshe nga njëri-tjetri. Ka diskutime dhe mirë është që të bëhen dhe të fliten. Ne kemi një situatë ku duhet që të krijojmë sinergji forcash’, tha ai.
I pyetur nëse ka ambicie për të kandiduar për kryetar të PD, kur të bëhen zgjedhjet, ai e mohoi këtë. Alimehmeti tha se ambicia e tij është të garojë në zgjedhjet vendore të 2027 për Bashkinë e Tiranës.
‘Unë jam në një situatë që po shoh me kujdes zgjedhjet vendore të 2027 për Tiranën dhe aty kam qenë i fokusuar gjithmonë’, tha ai.
