Gazetarja Admirina Peçi ka reaguar pasi ka lexuar në media se organizata ku ajo merr pjesë, “Qendra Ura”, do të administrojë Bunkart. Vendimi i qevereisë u komentua si një favor për Carlo Bollinon, pasi Peçi punon në median e italianit.
Peçi shkruan se nuk ka përfituar asnjëherë tender publik, financime shtetërore dhe se nuk drejton asnjë organizatë.
Reagimi:
“Ajo ndjesia kur ndjehesh i përdorur dhe koleget mezi presin të të hidhen ne fyt, edhe pse e dinë fare mirë se ti s’ke as sa dhjami i pleshtit… Mjerë ne që punojmë në këtë media dhe mjerë ky vend që pret t’i hapen sytë prej nesh… RIP gazetaria shqiptare!!!Në nëtor të 2014 u angazhova si kërkuese shkencore dhe kuratore në ekspoziten mbi Luftën e Dytë Botërore e hapur në Bunk’art. Shkrimet e shumta, vlerësimet e studiuesve të fushës dhe sidomos komentet e mrekullueshme të turisteve të huaj, ishin vlerësimi më i madh që mora nga ajo punë. Sot emri im si kërkuese shkencore në këtë projekt u përdor, me qëllim apo pa qëllim në mënyrën më të shëmtuar, nga vetë kolegët e mi me të cilët kohë më parë kam ndarë të njejtën redaksi. Në Bunk’art kam bërë kërkimin shkencor, kam sjellë mijëra foto e dokumente shumica dërrmuese e të cilave publikoheshin per te here te pare. Per ate pune jam paguar me nje shume simbolike (kenaqesia e vërtetë e përfshirjes në atë projekt ishte profesionale, jo financiare) . Nuk kam përfituar kurrë asnjë tender publik, asnjë financim shtetëror, nuk drejtoj asnjë ojf dhe asnjë organizatë tjetër të ngjajshme. Akti i gazetarit Habjon Hasani dhe i gjithë kolegëve të medias që publikuan këtë material sot është thjeshtë një akt burracak dhe turpërues për çdo gazetar, që në fillim dhe mbi gjithçka duhet të vendosë vërtetësinë e informacionit, konfirmimin e tij dhe ta zhvillojë investigimin jashtë zyrave të mykura. Shqipëria ka mijëra probleme, në vendin tonë zhvillohen qindra e mijëra afera. Gazetarët duhet të hapin sytë e të zbardhin qindra e mijëra shkelje që bëhen çdo ditë në këtë vend, e jo të përbaltin pa asnjë fakt një koleg të tyrin që fatmirësisht ka bërë vetëm punën në të mirë të shoqërisë dhe historisë tonë. Pres të më kërkojnë falje të gjithë kolegët e mi që publikuan emrin tim në një informacion të pavërtetë e keqdashës sot. Sigurisht nëse janë vërtet gazetare e jo peshkaqenë që rendin të gjejnë prenë e radhës çdo ditë”.
