Liangbin Chen, kinezi i liruar nga Gjykata e Tiranës pak ditë më parë, do të kundërshtojë ekstradimin drejt Kinës bazuar në një vendim të Parlamentit Europian, i cili më 9 qershor 2022 ka vendosur të pezullojë të gjitha marrëveshjet e ekstradimit me Kinën dhe Hong Kongun.
Chen ka hequr dorë nga shtetësia kineze që nga viti 2018 dhe mban pasaportë kamboxhiane. Chen ndodhet në masën e “arrestit në shtëpi” prej të premtes dhe është vendosur në një banesë në Lundër. Lirimi i tij, duke e kaluar në masën “arrest në shtëpi” u bë bazuar në një akt ekspertimi mjekësor, sipas të cilit, qëndrimi në qeli i rrezikonte jetën. Shtetasi kinez ka një problem në tru që nuk mund të trajtohet në kushtet e paraburgimit, por kërkon “mjekim intensiv nga specialistët e fushës”.
Chen u arrestua në Shqipëri në korrik të këtij viti për llogari të autoriteteve kineze. Sipas tyre, ai ka vjedhur 140 milionë dollarë përmes mashtrimit kompjuterik.
/a.r
