Policia e Elbasanit ka reaguar pas denoncimit të ish kryeministrit Berisha në rrjetet sociale se një person i armatosur dhe në gjendje të dehur hyri në ambientet e kësaj shkolle dhe terrorizoi nxënësit në shkollën “Ali Agjah”.
Lidhur me ngjarjen policia sqaron se është njoftuar nga drejtuesit e shkollës se në oborr hyri një person i panjohur, rreth 50 vjeç, të cilit iu kërkua të dilte menjëherë nga ambjentet e shkollës.
“Më datë 12.04.2019, rreth orës 10:50, tek shkolla “Ali Gjah” Elbasan, Policia u njoftua nga drejtuesit e shkollës se në oborr hyri një person i panjohur. Menjëherë pas marrjes së njoftimit, shërbime policore shkuan dhe morën takim me drejtuesit e shkollës dhe mësuesin, i cili kishte kontaktuar me personin që kishte hyrë në ambientet e shkollës.
Drejtuesit e shkollës sqaruan se rreth orës 10:50, mësuesi i përgatitjes fizike konstatoi në oborrin e shkollës një person rreth 50 vjeç, të cilit iu kërkua të dilte dhe pas kësaj ai doli jashtë ambieteve të shkollës.”, thuhet në njoftimin e policisë.
Policia ka marrë pamjet filmike të shkollës, e nga kqyrja nuk është konstatuar që personi të ketë kryer veprime të pahijshme apo të kundraligjshme ndaj mësuesve apo fëmijeve të shkollës, apo te kishte në duar sende të kundraligjshme.
/a.rada
