Ndryshimet kushtetuese të Reformës në sistemin e Drejtësisë hyjnë sot në fuqi. Vendimi unanim i Parlamentit në mbledhjen e 22 korrikut, që u finalizua me 140 vota pro, do të fillojë sot të prodhojë efektet e saj ligjore. Por, edhe pse ndryshimet kushtetuese do të hyjnë në fuqi, zbatimi i reformës mbetet ende i largët.
Shkak për këtë ngërç është bërë mosmiratimi në kohë i 7 projektligjeve që shoqërojnë paketën në drejtësi. Miratimi i projektligjeve do të fillojë me ngritjen e institucioneve të reja të Drejtësisë, si Këshilli i Lartë i Prokurorisë, Këshilli i Lartë i Gjyqësorit, Këshilli i Emërimeve në Drejtësi, Inspektori i Lartë i Drejtësisë, Byroja Kombëtare e Hetimit dhe Njësia e Posaçme Antikorrupsion, po ashtu dhe Këshilli dhe Komisioni i Apelimit që do të kryejë procesin e vetingut. Ngërçi i parë Nga mosmiratimi i projektligjeve të paketës së Reformës në Drejtësi, është krijuar dhe handikapi i parë i reformës.
Në një kohë që Kushtetuta detyron Presidentin që 5 ditë nga hyrja në fuqi e ndryshimeve të reja të hedhë shortin për emërimet e anëtarëve të Këshillit të Emërimeve në Drejtësi, baza ligjore për këtë institucion ende nuk është miratuar. Për rrjedhojë, Presidenti është para dy dilemave: të hedhë shortin pa bazë ligjore, ose të mos zbatojë Kushtetutën, duke ia kaluar këtë kompetencë Parlamentit.
Nënkryetari i Komisionit të Ligjeve, Oerd Bylykbashi, ka thënë për “Report Tv” se ky ngërç u krijua për shkak të draftit të njëanshëm kushtetues që miratoi maxhoranca. “Përtej konsensusit politik, e kemi thënë që në fillim të procesit që drafti i njëanshëm kushtetues kishte probleme të rënda në lidhje me sistemin e institucioneve.
Shembull për këtë ishte KED, i cili ishte guri i themelit të arkitekturës së kapjes politike. Ne arritëm ta zhbëjmë këtë aspekt, por me insistimin e PS-së, KED mbeti në Kushtetutë si një apendicit, që më shumë krijon probleme në zbatimin e Kushtetutës.
Dhe ja, ekspertët e qeverisë kanë hartuar draftin në mënyrë të tillë që nuk mund të zbatohet, edhe pse Presidenti po mbledh ekspertë e parti politike që të gjejë një rrugëdalje nga qorrsokaku kushtetues. Kjo është reforma kushtetuese, kur Kryeministri dhe deputetët e tij deklarojnë se e votojnë pa e lexuar. Dhe ky është vetëm fillimi i problemeve”, u shpreh Bylykbashi.
