Princi Harry dhe gjashtë paditësit e tjerë janë urdhëruar të paguajnë paraprakisht rreth 9.54 milionë paund për Associated Newspapers Limited (ANL), botuesin e Daily Mail, pasi dështuan në betejën gjyqësore lidhur me pretendimet për cenim të privatësisë.
Çështja kundër ANL-së lidhej me akuzat se ndaj paditësve ishin përdorur metoda të paligjshme për sigurimin e informacionit dhe të dhënave private. Kompania i ka hedhur poshtë në mënyrë kategorike të gjitha këto pretendime.
Gjyqtari Nicklin i Gjykatës së Lartë rrëzoi më 7 korrik apelet e paraqitura, duke arritur në përfundimin se paditësit nuk kishin mundur t’i vërtetonin akuzat e tyre.
Në mesin e personave që kundërshtuan vendimin ishin Princi Harry, këngëtari Elton John, bashkëshorti i tij David Furness, Sir Simon Hughes, Sandy Frost, Liz Hurley dhe Baronesha Doreen Lawrence.
Procesi përfshiu dëshmitë e dhjetëra personave, mes tyre edhe Dukës së Sussex-it dhe paditësve të tjerë. Për të qenë i pranishëm në seancat gjyqësore, Harry udhëtoi nga Shtetet e Bashkuara drejt Britanisë.
Associated Newspapers, gazetarët e saj dhe drejtuesit aktualë apo të mëparshëm të kompanisë kanë mohuar se kanë kryer shkelje ose se kanë përdorur metoda të paligjshme.
Pas vendimit, Princi Harry dhe Baronesha Doreen Lawrence thanë se në gjykatë kishin kërkuar “drejtësi dhe llogaridhënie”, por sipas tyre nuk kishin marrë asnjërën prej tyre.
“Ky është një mbulim i plotë dhe i hapur, megjithëse për fat të keq jo i papritur”, u shprehën ata në një deklaratë të përbashkët.
ANL-ja i kërkoi gjykatës që paditësit të paguanin paraprakisht mbi 9.9 milionë paund për shpenzimet ligjore, përpara përcaktimit të kostos përfundimtare të çështjes.
Avokatët e paditësve kërkuan që kjo shumë të ulej në pak më shumë se 7.9 milionë paund. Gjithsesi, gjyqtari caktoi pagesën fillestare në rreth 9.54 milionë paund, e cila duhet të kryhet deri më 28 gusht.
Vlera përfundimtare e kostove ligjore që do të mbulohen nga paditësit do të vendoset në një fazë të mëvonshme të procedurave.
