Zinxhirët kryesorë të hoteleve evropiane po punësojnë punëtorë pa përvojë, pasi drejtuesit pranojnë se një pjesë e madhe e punëtorëve janë larguar qëkur Covid-19 shpërtheu.
Mijëra punëtorë u larguan kur udhëtimet ndërkombëtare u mbyllën gjatë pandemisë Covid-19. Shumë zgjodhën të mos ktheheshin, duke gjetur punë më mirë diku tjetër, duke i lënë hotelierët të përballen me një mungesë të theksuar të stafit. Në Portugali tanimë shërbimet hoteliere po afrojnë njerëzit që nuk kanë punuar më parë në industri.
Punonjësve të rinj që kryesisht janë studentë nga Afrika e Veriut u jepen gjashtë orë trajnim që të mësojnë punën në hotel. Mungesa e stafit është veçanërisht në Spanjë dhe Portugali, ku turizmi përbënte përkatësisht 13% dhe 15% të prodhimit ekonomik përpara pandemisë. Hotelierët atje ofrojnë paga më të larta, akomodim falas dhe përfitime si bonuse dhe sigurime shëndetësore.
“Mendoj se kjo është një e keqe që i prek të gjithë. Pasi të gjithë po e ndjejmë shumë mungesën e stafit të kualifikuar sepse ndonjëherë për 20 apo 30 Euro shtesë kalojnë në një kompani tjetër dhe kjo ka kosto dhe çon në shumë probleme operative”, shprehet përfaqësuesi i një hoteli.
Hotelet në Portugalinë jugore të famshëm për fushat e golfit dhe plazhet me rërë të bardhë, janë tashmë 60-80% plot për muajt e pikut për Korrikun dhe Gushtin, sipas Shoqatës së Hoteleve të Portugalisë
“Nuk ka të bëjë vetëm me çmimet dhe pagat. Punëtorët po punojnë shumë më tepër për shkak të mungesës së personelit, kështu që hoteli duhet të punojë me orare të gjatë dhe puna është më e vështirë për punëtorët në biznesin e hoteleve , veçanërisht gjatë verës”.
Punëtorët dhe drejtuesit e sindikatave fajësojnë orët e gjata të punës, pagat e ulëta dhe kontratat e përkohshme, duke detyruar shumë të gjejnë punë diku tjetër. Disa u zhvendosën në ndërtim dhe bujqësi. Të tjerë preferuan punën nga shtëpia. Spanja ka shkallën e dytë më të lartë të papunësisë së të rinjve në Evropë pas Greqisë, sipas të dhënave të Eurostat, me 29% të njerëzve nën 25 vjeç pa punë. Në Portugali, rreth 20% e atyre të moshës 16-24 vjeç janë të papunë.
“Ka një krizë të kamarierëve kjo për shkak të pagave të ulëta dhe orët e gjata. Por unë mendoj se kjo është një krizë strukturore e ekonomisë dhe punës në Spanjë. Jo vetëm në sektorin e mikpritjes, dhe nëse vazhdojmë të mungojnë kamarierët, ajo që do të ndodhë në të ardhmen është që nuk do të ketë bare”, shprehet pronarja e një restoranti.
Sipas shoqatave kombëtare të mikpritjes, industria e hotelierisë në Spanjë ka 200,000 punëtorë dhe hotelet portugeze kanë nevojë për të paktën 15,000 njerëz më shumë për të përmbushur kërkesën në rritje.
“Nëse nuk ka punëtorë në dispozicion, nëse nuk mund të rekrutojmë, do të duhet të shkurtojmë shërbimet, të shkurtojmë disponueshmërinë tonë për të punuar dhe kjo është për të ardhur keq. Është kaq dramatike për një industri që nuk ka pasur të ardhura për dy vitet e fundit”, thotë drejtori i operacionit në PHC Hotel, Miguel Andrade.
Në Spanjë, baret dhe restorantet rritën pagat e punëtorëve me gati 60% në tremujorin e parë krahasuar me një vit më parë, sipas të dhënave zyrtare. Por industria e turizmit është ende sektori që paguan punonjësit më pak, rreth 1,150 Euro në muaj.
Në Portugalinë fqinje, pagat për punonjësit e mikpritjes pritet të rriten me 7% këtë vit, sipas një sondazhi nga banka qendrore dhe Instituti Kombëtar i Statistikave, por paga mesatare në këtë sektor është 881 Euro në muaj. Industria e turizmit në Spanjë dhe Portugali është shumë e varur nga punëtorët migrantë dhe për shkak të COVID nuk janë kthyer ende.
/a.r
