Kryeprokurori i Hondurasit, Johel Zelaya, tha të hënën se ai kishte urdhëruar autoritetet dhe u kishte kërkuar nga Interpoli të ekzekutonin një urdhër arresti të vitit 2023 për ish-presidentin Juan Orlando Hernández, të falur nga presidenti amerikan Donald Trump.
Hernández u lirua nga burgu federal në Shtetet e Bashkuara javën e kaluar pasi u fal nga Trump. Hernández ishte dënuar vitin e kaluar nga një gjykatë federale amerikane me 45 vjet burg për ndihmën e dhënë në trafikimin e tonelatave të kokainës drejt SHBA-së.
Ai kaloi nga aleat i supozuar i SHBA-së në luftën kundër drogës, në objekt të një kërkese ekstradimi nga SHBA pak pasi la detyrën në vitin 2022. Ai u arrestua dhe u dërgua në SHBA nga presidentja aktuale Xiomara Castro e partisë socialdemokrate LIBRE.
Zelaya publikoi një foto të urdhrit dyvjeçar të nënshkruar nga një gjyqtar i Gjykatës së Lartë, për akuza të dyshuara për mashtrim dhe pastrim parash. Urdhri thotë se ai duhet të ekzekutohet “në rast se i akuzuari lirohet nga autoritetet e Shteteve të Bashkuara”.
Dhjetëra zyrtarë dhe politikanë hondurianë u përfshinë në të ashtuquajturin “rasti Pandora”, në të cilin prokurorët pretenduan se fondet qeveritare ishin devijuar përmes një rrjeti organizatash joqeveritare drejt partive politike, përfshirë fushatën presidenciale të Hernández në vitin 2013.
Bashkëshortja e Hernández tha pas lirimit të tij se ish-presidenti ndodhej në një vend të paidentifikuar për arsye sigurie.
Hernández gjithmonë i ka mohuar akuzat gjatë kohës në detyrë dhe ka këmbëngulur se ai ishte një nga aleatët më të fortë të SHBA-së kundër trafikut të drogës.
Trump njoftoi qëllimin e tij për të falur Hernández vetëm disa ditë para zgjedhjeve kombëtare në Honduras, duke shtuar një element të ri në një garë të ngushtë. Ndërsa disa hondurianë mbeten nostalgjikë për dy mandatet e Hernández, shumë u tronditën që një njeri i dënuar për trafik droge në një gjyq të ndjekur nga afër mund të lirohej papritur herët nga dënimi i tij.
Trump tha se hondurianët kishin kërkuar faljen për Hernández dhe se pasi shqyrtoi çështjen e tij, ai vendosi se Hernández ishte trajtuar padrejtësisht nga prokurorët.
