Historia e babait që përloti përdoruesit e rrjeteve sociale
Historia e një babai që shiste stilolapsa për të mbajtur dy vajzat e tij ka prekur zemrat e shumë përdoruesve të rrjeteve sociale ditët e fundit. Abdul, një 35-vjeçar sirian, as nuk e dinte se dikush mund ta kishte fotografuar ndërsa shiste stilolapsa rrugëve të Bejrutit me vajzën e tij në krahë.
Një aktivist norvegjez e ka hasur foton në internet dhe e ka shpërndarë atë në profilin e tij në Tuiter. “Babai sirian që shet stilolapsa me vajzën e tij në krahë në rrugët e Bejrutit”, shkroi Gissur Simonarson dhe kjo mjaftoi që fotoja të bënte xhiron e botës.
Brenda pak orësh, Simoarson mori shumë oferta për ndihmë ndaj shitësit të stilolapsave, por askush nuk e dinte kush e kishte bërë foton dhe si mund të lidheshin me burrin me fëmijë në krahë.
Në rrjetet sociale u hap fushata “Buy Pens” për të ndihmuar në identifikimin e burrit, i cili u gjet dy ditë më vonë. Simarson lançoi fushatën e mbledhjes së fondeve me një objektiv prej 5 mijë dollarësh, shumë që u arrit për gjysmë ore.
Në 24 orë, rreth 3000 njerëz arritën të mblidhnin 80 mijë dollarë.
Në momentin që e mori vesh këtë fakt, Abdul tha me lot në sy se më në fund mund t’i çonte në shkollë dy vajzat e tij. Në faqen që është hapur për të shkruhet: “Faleminderit të gjithëve për mbështetjen. Është bukur kur njerëzit mblidhen dhe bëjnë një ndryshim kaq të madh në jetën e dikujt”.
