Prishja e kishës në Dhërmi, kërcënon nacionalisti grek Nicholas Gage
Shembja e objektit pa leje, e cila shërbente prej 23 vjetësh si kishë për besimtarët ortodoksë të Himarës, ka shkaktuar jo pak reagime në qarqet vendase dhe të huaja. Qeveria vendosi shembjen e objektit, që u ndërtua nga vendasit e Dhërmiut në Himarë, në vitin 1992 mbi truallin e kishës së vjetër, për shkak se ai ishte pa leje. Tashmë, projekti për rindërtimin e Kishës së Shën Thanasit është gati dhe u prezantua dje nga ministri i Mirëqenies Sociale dhe Rinisë, Blendi Klosi, në një takim me banorët e zonës.
Greqia reagoi duke e dënuar aktin, madje pati raportime për një notë proteste Shqipërisë, por edhe përcjellje të shqetësimeve deri në Bruksel e Uashington. Ashpër reaguan edhe Kisha Orthodokse, OMONIA, PBDNJ, por edhe opozita shqiptare, e cila u bë palë me qëndrimet e tyre, se po shkeleshin të drejtat e besimtarëve ortodoksë, madje dhe të minoritetit grek në Shqipëri.
Mesa duket, paranoja e nacionalistëve grekë nuk ka fund. Jo më larg se dje, Presidenti i Federatës Panepirotike të Amerikës në ShBA dhe Shqipëri, Nicholas Gage, i njohur si antishqiptar e nacionalist i flaktë ka reaguar lidhur me çështjen “Shën Thanasi”. Një artikull i publikuar në një portal amerikan, “Hellenic News of America”, Gage shprehet se shembja e kishës “ka shtuar frikërat në komunitetin e madh shqiptar të grekëve etnikë për ringjalljen e persekutimit të krishterëve ortodoksë që përbëjnë një të tretën e shtetit me 3.5 milionë banorë”.
Ai arrin deri aty sa e krahason shembjen e një objekti të ndërtuar pa leje me shkatërrimin e kulteve fetare gjatë regjimit të Enver Hoxhës. “Rrafshimi i Kishës së Shën Athanasit i bën jehonë veprimeve brutale të regjimit stalinist, që e drejtoi Shqipërinë për gjysmën e shekullit të shkuar, kur forcat qeveritare ekzekutonin priftërinjtë, i kthenin kishat në stalla dhe burgosnin këdo që mbante kryq apo lexonte Biblën”, mendon Gage. Sipas tij, Tirana duhet “të ndryshojë veprimet e saj brutale është të ofrojë një vend alternativ për ndërtimin e kishës së re dhe të japë fonde për ta ndërtuar atë”.
Po ashtu, shkrimi citon edhe OMONIA-n dhe PBDNJ-shin, të cilat, përmes deklaratave të tyre, dënuan “aktin brutal të shkatërrimit të kishës” dhe paralajmëruarn se “kjo do të dëmtojë seriozisht marrëdhëniet midis qeverisë së Kryeministrit Rama dhe të gjitha minoriteteve në vend”. Artikulli saktëson se Zv.presidenti i Federatës po udhëton për në Shqipëri për të vlerësuar trajtimin e minoriteteve në vend, ndërsa i ka bërë thirrje qeverisë shqiptare për të lëvizur shpejt dhe në mënyrë vendimtare për riparimin e marrëdhënies me qytetarët e Kishës Orthodokse, nëse dëshiron të sigurojë një vend me të drejta në komunitetin e kombeve të qytetëruara.
