“Hiq dorë brenda tre ditësh duke shpikur ndonjë arsye për motiv shëndetësor apo personal ndryshe një pjesëtar i familjes të dne do zhduket. Mos të shkoj mendja te policia se pasojat do të jenë të menjëhershme”. Ky është mesazhi që i është dërguar kandidatit të opozitës në Bashkinë Pogradec.
Partia Demokratike ka denoncuar ashpër paraditen e së enjtes presionet dhe kërcënimet që, sipas saj, po bëhen ndaj kandidatëve të djathtë në zgjedhje, nga ai që e quajti “kontigjenti kriminal që po operon në krah të dyshes Rama-Meta”.
“Kandidati i Aleancës për Punë e Dinjitet për Pogradecin, Eduart Kapri ka marrë një mesazh kërcënues, të tipit mafioz, ku i kërkohet të tërhiqet për tre ditë nga gara, në të kundërt ai do të ketë pasoja të rënda. Eduart Kapri garon përballë kandidatit të Ilir Metës. Ky kërcënim brutal, kriminal dhe i paprecedent vjen 10 ditë para mbajtjes së zgjedhjeve, në kohën kur të gjitha të dhënat flasin për një fitore të padiskutueshme të Eduart Kaprit në Pogradec”, ka deklaruar kreu i grupit parlamentar të PD-së, Edi Paloka.
