Mjafton një shëtitje drejt vijës bregdetare jugore për të kuptuar se sezoni turistik ende nuk është mbyllur plotësisht.
Plazheve të Himarës ka pushues, kryesisht të huaj.
“Bashkia e Himarës është zemra e turizmit në Shqipëri, vitet e fundit qeveria shqiptare, investitorët, bashkia ka ndërhyrë shumë. Viti 2022 ka qenë pak më lart se viti 2019, sepse turizmi ka qenë në kohë më i gjatë, ka filluar në muajin Prill dhe akoma nuk ka mbaruar, kjo do të thotë që puna që është bërë, investimet po e japin efektin e vet”, thotë Jorgo Goro, kryetari i bashkisë së Himarës.
Ndërhyrjet në infrastrukturë, sheshe, në rrugë të brendshme të fshatrave buzë detit dhe larg tij apo edhe rinovimi i banesave karakteristike e kanë dhënë efektin e pritshëm e rritjen e numrit të pushuesve. Të tjera investime janë planifikuar.
Shëtitoreve të Dhërmiut, Jalës, Qeparosë do i shtohen edhe ato të Drimadhës dhe Borshit. Ndërsa ajo e Himarës do zgjerohet edhe më tej.
“Ky është një koordinim i plotë i pushtetit lokal me qendror. Do kemi edhe lote të tjera për shëtitoren e Himarës, do jetë loti nga Porti deri këtu ku fillon shëtitorja e re, pastaj nga shëtitorja e re deri në zonën e Potamit”.
Investimet në bashkinë Himarë po fokusohen së fundmi në furnizimin me ujë dhe përmirësimin e impianteve për ujërat e ndotura.
“Ka filluar projekti i ujësjellësit të madh të qytetit të Himarës, i cili do kapë gjithë pellgun nga Vunoi, Qeparoi, Borshi të cilat bëhen me ujë të rrjedhshëm 24 orë, dhe në të njëjtën kohë bëhen edhe impianti i qytetit dhe ujërat e ndotura”.
Himara nuk ofron për pushuesit vetëm detin e pastër, por edhe fshatrat me ndërtime karakteristike. Prandaj rikonstruksioni i rrugëve që të çojnë drejt tyre dhe rijetëzimi i qendrës së çdo fshati ka tepër rëndësi.
“Tashmë faza e dytë konvergjon në pjesën e infrastrukturës së brendshme, pra rrugët e brendshme të fshatrave dhe fasadat, si në rastet e Vunoit dhe Dhërmiut, kanë pësuar një transformim total, ajo është destinacioni i të gjithë fshatrave të bashkisë së Himarës”.
Rreth 44 mijë pushues mesatarisht në ditë e kanë vizituar Himarën për këtë sezon turistik, një numër ky që drejtuesit e pushtetit lokal presin të rritet ndjeshëm, pas investimeve të planifikuara për rijetëzimin e bregdetit dhe shtimin e kapaciteteve akomoduese bashkëkohore.
/a.r
