Shkodranët janë detyruar të përballen më një situatë të pakëndshme brenda në qytet. Për këtë arsye vetë bashkia ka ndërhyrë duke marrë masa ndaj një subjekti që hidhte mbetje industriale në një nga pikat e grumbullimit, ku hidhen vetëm mbetje urbane.
Me anë të një reagimi në rrjetet sociale, Bashkia Shkodër bën me dije së në bashkëpunim me policinë kanë identifikuar mjetin, i cili rezultonte në pronësi të subjektit KENA 12. Për këtë të fundit është vendosur gjobë në shumën pesëmbëdhjetë mijë lekë.
‘Një furgon i mbushur me mbetje industriale i hedh të gjitha në një nga pikat e grumbullimit në qytet duke mbushur të gjithë pikën brenda dhe jashtë kontenierëve, ndërkohë që pika të tilla grumbullimi janë për mbetjet urbane dhe jo për mbetjet industriale dhe tregtare. Ligji e ka të shprehur qartë volumin që duhet të mbajë një kontenier në zonat e banuara dhe çdo pikë i shërben vetëm territorit të vet. Pas denoncimit të rastit në fjalë, nga ana e policisë bashkiake u bë identifikimi i mjetit i cili rezulton në pronësi të subjektit KENA 12, që vepron në Shkodër me aktivitet, prodhim këpucësh, me administrator Qemal Bekteshi.
Ndaj subjektit në fjalë u vendos masa administrative gjobë, në shumën 15 000 (pesëmbëdhjetë mijë) lekë,” shkruhet në faqen zyrtare të Bashkisë Shkodër.
