Prokuroria e Përgjithshme ka nisur verifikimet në lidhje me kallëzimin penal të Policisë së Shtetit ndaj drejtorit të spitalit të Beratit, shtetasit Iraid Frashëri, i cili dyshohet se ka mbështetur në fushatë deputetin e LSI-së, Gledion Rahovica, shkruan “Panorama”.
Burime jo zyrtare thanë se kallëzimi nuk është regjistruar ende si procedim, pasi po verifikohet përmbajtja e materialeve të referuara nga policia për dy zyrtarët.
Jo zyrtarisht mësohet se në materialin e përcjellë nga Policia e Shtetit, përshkruhen komunikime telefonike me mesazhe dhe biseda verbale që drejtori i spitalit ka bërë me punonjësit e institucionit duke i njoftuar për takimet elektorale të deputetit Gledion Rahovica.
Policia pretendon se drejtori i spitalit ka ftuar vartësit e tij në këto takime e madje u ka kërkuar të jenë pjesëmarrës në to. Tri ditë më parë, Policia bëri publik kallëzimin ndaj dy zyrtarëve me akuzat e “korrupsionit aktiv në zgjedhje” dhe “përdorim i funksionit publik në veprimtari politike ose zgjedhore”.
Prokuroria theksoi se çështja është në fazën e verifikimit paraprak, por nuk përjashtoi mundësinë që në ditët e ardhshme të thirren për të dhënë deklarime në cilësinë e personave që kanë dijeni, ish-drejtori i spitalit e deputeti, por edhe personat që e kanë denoncuar këtë rast në Policinë e Beratit.
Dje, përmes një deklarate, zv.kryeministrja Mandija tha se “Sektori për Hetimin e Korrupsionit në Policinë e Shtetit në bazë të një denoncimi ka filluar procedimin penal ndaj Drejtorit të Spitalit Rajonal të Beratit, i cili në bashkëpunim me disa punonjës të këtij spitali dhe me një deputet të zonës kanë arritur të konsumojnë veprën penale të korrupsionit aktiv në zgjedhje, si dhe përdorimit të funksioneve publike në veprimtari politike ose zgjedhore, të parashikuara nga neni 328 dhe 328/a të Kodit Penal të ndryshuar”./Panorama/a.m.
