Zyrtarisht Policia e Tiranës tha dje se motivi i krimit në familje që ndodhi në Valias ishte një konflikt pronësie mes dy vëllezërve. Por duket se shkaku i vërtetë i ngjarjes ka qenë kultivimi i kanabisit, të paktën sipas provave të zbuluara në orët e mbrëmjes pas krimit.
“Panorama” shkruan se hetimet u orientuan drejt këtij motivi në momentin që efektivët e Policisë së Krujës bënë kontrollin e banesës, ku gjetën në një magazinë pranë saj 70 kubikë me bimë narkotike.
Kontrolli u krye nga efektivët e Krujës, duke qenë se familja Kallari jeton në fshatin Qerekë, që është në juridiksionin e këtij komisariati policie.
Në një kohë që edhe prindërit e viktimës e autorit flisnin për një konflikt pronësie mes tyre, po ashtu edhe vetë i arrestuari, dëshmia e vjehrrit të tij ka bërë që policia të hetojë edhe në një pistë tjetër. Atë të mosmarrëveshjeve për kultivimin e kanabisit.
Nëna dhe babai i viktimës e autorit kanë mohuar të kenë pasur dijeni për bimët narkotike, duke pretenduar se nuk kishin hyrë prej kohësh në magazinën ku ato u gjetën.
Megjithatë, disa dëshmi të personave të afërm me familjen kanë hedhur poshtë pretendimet e tyre, madje duke pohuar se dy vëllezërit kishin debatuar vazhdimisht gjatë ditëve të fundit në lidhje me kultivimin e bimëve narkotike.
Dyshohet se viktima, Elmir Kallari, ka dashur të kultivojë bimë narkotike në pronën e përbashkët të familjes. Ai ka hasur në rezistencën e vëllait të tij, Afrim Kallari dhe kjo ka sjellë edhe përplasjen e ashpër fizike mes tyre, që u mbyll me vrasje./a.m.
