Prokuroria e Krimeve të Rënda është duke hetuar rolin e dhjetëra efektivave të Policisë në aksionet kundër kultivimit të kanabisit. Hetimi ka nisur muaj më parë, në ditët e para të korrikut 2016, pas një raporti të Shërbimit Informativ në lidhje me “kultivimin masiv” të kanabisit në vend dhe mosveprimin e Policisë.
Në vazhdim të hetimeve që mësohet se po vazhdojnë, Prokuroria e Krimeve të Rënda ka kërkuar zyrtarisht nga misioni i Policisë italiane në Tiranë, “Interforce”, materialet e mbledhura nga vëzhgimi me avion në gjithë territorin shqiptar.
Kërkesa zyrtare për t’u njohur me materialet e mbledhura gjatë fluturimit me avionin e Policisë italiane, është bërë për të ballafaquar rastet e ndërhyrjeve dhe për të gjetur nëse ka pasur raste mosveprimi nga ana e Policisë shqiptare.
Pak ditë më parë, kryeprokurori i Krimeve të Rënda, Besim Hajdarmataj, duke shfrytëzuar një takim me kryeprokurorin e Antimafias së Leçes, Catalto Motta, kërkoi njohjen me materialet e mbledhura nga misioni “Interforce”.
Prokuroria kërkon që me anë të “hartës së parcelave me drogë” të verifikojë dyshimet për ndërhyrje selektive në zona të caktuara apo edhe për raste të dekonspirimit të aksioneve që duhej të kishin goditur grupet e mëdha që kultivojnë kanabis.
POLICËT DHE DROGA
Nga ana tjetër, nuk është e qartë nëse intensifikimi i hetimeve për këtë procedim penal ka lidhje me vizitën e prokurorit italian në Tiranë pak ditë më parë. Nga ana tjetër, ajo që bie në sy është se në disa aksione radhazi, pas hetimeve të Prokurorisë së Krimeve të Rënda, janë kapur sasi nga 1 deri në 4 tonë kanabis, pikërisht në lokalitetet e përmendura në raportin e SHISH-it.
Në rastin e aksioneve në Vlorë dhe në Kurbin, bashkë me kultivuesit e parcelave të mëdha të kanabisit, nën akuzë janë vendosur edhe efektiva policie, që rezultojnë se kanë bashkëpunuar, e madje kanë qenë bashkëfinancues e përfitues nga aktiviteti i kultivimit të kanabisit. Zan Kasmi, oficer policie, u arrestua në aksionin e fundit në Kurbin, bashkë me shtetasit Luftar Nelaj, Hashim Nelaj, Elton Haxhia, Bashkim Kodra etj.
Një efektiv policie në Vlorë është shpallur në kërkim nga Prokuroria pas aksionit të 4 tetorit 2016 në fshatrat Treblovë, Vezhdanisht dhe Vranisht të luginës së lumit Vlorë, ku u gjetën sasi të mëdha kanabisi dhe parcela të paprekura me drogë. Nga ana tjetër, ka pasur informacione për bashkëpunim të efektivave të Policisë me industrinë e kanabisit edhe në Shkodër, Korçë, Tiranë dhe në disa rrethe të tjera.
ma.me
