Telefonat e Elvis dhe Gjon Shkambit, të vënë në akuzë nga Prokuroria e Tiranës si autorë të vrasjes së gjyqtarit të Apelit, Astrit Kalaja, pritet të dërgohen për ekspertizë.
Bëhet fjalë për dy aparate celular, zbërthimi i të cilave mund të ndihmojë grupin hetimor për të mësuar më shumë rreth krimit të rëndë në sallën e gjyqit në Gjykatën e Apelit dhe nëse ai ishte pjesë e një plani të mirëmenduar.
Burime pranë grupit hetimor thanë për TV Klan se hapja e telefonave të vrasësit dhe xhaxhait të tij nuk përjashton mundësinë e zbulimit të personave të tjerë që mund të kenë nxitur 30-vjeçarin, Shkambi, të kryejë ekzekutimin.
Nga ana tjetër, policia dhe prokuroria po verifikon thëniet e Elvis Shkambit, i cili ka pretenduar se armën e mbante me vete kudo, madje dhe kur futej në institucione apo gjykata.
Ky deklarim, sipas grupit hetimor, është përdorur nga vrasësi si alibi, për të krijuar bindjen se vrasja nuk ka qenë e paramenduar.
Policia dhe prokuroria, jozyrtarisht, thonë se ka prova që ngjarja ka qenë e planifikuar nga 30-vjeçari, e madje në këtë plan ka qenë i përfshirë dhe xhaxhi i tij, Gjon Shkambi, dyshim për të cilin ky i fundit nuk pranon të flasë.
Të dy ata, së bashku me rojen e sigurisë së Gjykatës së Apelit, që nuk kishte marrë asnjë masë ndonëse pajisja skaner kishte detektuar prezencën e sendeve të ndaluara, pritet të dalin të enjten para gjykatës për t’iu komunikuar masat e sigurisë.
