RENEA ushtroi disa kontrolle në qytetin e Shkodrës. Sipas burimeve, u lëshuan 4 masa sigurie ‘arrest në burg’ në lidhje me masakrën e Dobraçit, ku u vranë 4 persona. Dy prej tyre iu komunikuan Samuel Troshanit dhe Izmir Sakicës që u vetëdorëzuan në janar dhe ndodhen në qeli për një tjetër ngjarje.
Gazetari Trashëgim Sokolaj, në një intervistë për “ABC News”, theksoi se që kur SPAK mori në dorë dosjen, hetimet kanë avancuar. Sipas gazetarit, prokuroria e posaçme ka krijuar një tablo tjetër, pasi hetimet dhe të dyshuarit për këtë masakër tregojnë lidhje edhe me ngjarje të mëparshme.
“Janë kryer tre kontrolle që pas ngjarjes së rëndë ku patëm 4 viktima në masakrën e Dobraçit. Operacioni i mëparshëm është zhvilluar në 12 Dhjetor dhe ka qenë i ngjashëm në formë me kontrolle banesash dhe automjetesh dhe bastisje të zonave ku mendohet se mund të qëndrojnë personat që janë në hetim për këtë ngjarje. Operacioni i sotëm ka si synim mbledhjen e provave të reja në lidhje me ngjarjet kriminale në Shkodër.
E reja është që pasi mori SPAK dosjen e masakrës me 4 viktima, sipas informacioneve që kam, hetimi nuk është ndalur vetëm te kjo çështje por ka avancuar se është zbardhur itenerari i automjetit të autorëve dhe ai itenerar përpara ngjarjes, zona nga ku ka dalë automjeti dhe më pas largimi në periferi për ta djegur si dhe personat e dyshuar i kanë shfaqur SPAK një ekspozitë tjetër dhe jemi edhe te ngjarje të tjera të ndodhura para. Jemi te një zinxhir ngjarjesh. Koha që u zgjodh për të bërë këto kontrolle, janë kontrolluar dy banesa, njëra prej të cilave e Safet Bajrit, ka pasur qëllimin e befasisë“, tha gazetari.
