Komiteti Shqiptar i Helsinkit ka shprehur kundërshti dhe keqardhje lidhur me protestën e organizuar nga një grup qytetarësh me në krye Kryetarin e Bashkisë së Tiranës, Erjon Veliaj, ku bën thirrje për ndryshimin e trupit gjykues që do të gjykonte çështjen lidhur me ndërtimin e pallatit 17 katësh tek diga e liqenit.
“Pikërisht për këtë arsye u vendos shtyrja e çështjes për një datë tjetër, ndërsa sipas njoftimeve të medias gjyqtaria Alkelina Gazidede i paraqiti Kryetarit të trupit gjykues tërhqjen e saj. KSHH vëren se protesta të tilla bien ndesh me parimet kushtetuese të shtetit të së drejtës dhe mund të shoqërohen me pasoja të dëmshme”, thuhet në njoftimin për shtyp të KSHH-së.
Në këtë deklaratë nënvizohet se në vlerësimin e KSHH-së, vendimet e gjykatës ose veprimtaria e saj mund të kritikohet, pasi shprehja e lirë e mendimit garantohet me ligj dhe rrjedhimisht kritika ndaj organeve të drejtësisë nuk është tabu. Por, sipas saj, janë të pajustifikueshme dhe të paligjshme veprimet që mundet ose efektivisht ndikojnë në veprimtarinë normale të gjyqeve, aq më tepër kur në to ka edhe elemente të fyerjeve apo presioneve.
ma.me
