Ministri i Transportit dhe Infrastrukturës, Edmond Haxhinasto, i shoqëruar nga Kryetari Bashkisë Kukës Hasan Halili inspektoi sot disa nga veprat më të rëndësishme të këtij qyteti.
Në fillim ai u ndal në objektin “Dublimin e Urave të Kukësit”, në segmentin Kukës- Morinë, ku theksoi rëndësinë dhe prioritetin që ka kjo rrugë për lidhjen me Kosovën por edhe për zhvillimin e zonës.
“Rruga duhet të shërbejë për zhvillim dhe është e domosdoshme që komunitetet përgjatë saj mos ta shikojnë si ndërtimin e një muri të pakalueshëm, por ta shikojnë atë si mundësi, lehtësi dhe aktivitet ekonomik. Në buxhetin e këtij viti kemi realizuar në kohë rekord planifikimin dhe realizimin e një nënkalimi për fshatin Pobreg, i cili ishte praktikisht i ndarë në pamundësi komunikimi në të dy anët e saj”. tha Haxhinasto
Ndalesën e dytë, Ministri e bëri në Aeroportin e Kukësit, realizuar me financimin Emirateve të Bashkuara Arabe të cilin e vlerësoi si një investim dhe vepër dinjitoze, aktualisht në gjendje konservimi nga autoritetet e Aviacionit Civil .
Gjatë inspektimit Ministri Haxhinasto vlerësoi se aeroporti është mirëmbajtur në një gjendje tepër të mirë dhe ka kushte teknike të mira. Ai kërkoi nga autoritetet që Aeroporti të jetë i gatshëm për një situatë të re ku fluturimet ndërkombëtare mund të lejohen.
“Uroj të jetë si një bazë e mirë për fluturime, veçanërisht për ato low cost. Kapacitetet që parashikohen të përpunojë ky aeroport mund të punësojnë mbi 200 punonjës, mundësi shumë e mirë për të rinjtë e qytetit” tha ai.
Në fund të vizitës së tij ai u ndal në Bashkinë e Kukësit, ku u diskutua për zhvillimin ekonomik dhe turistik të zonës, për të rritur punësimin e banorëve të Kukësit dhe zonave përreth. Takimi u fokusua në prezantimin me investimin e ri të qeverisë në Ujësjellësin e Kukësit, për furnizimin e banorëve me ujë të pijshëm.
“Ky investim i ri do të sjellë furnizim me ujë për 24 orë për rreth 40 mijë mije banorë, me prurje mbi 250 litra në sekondë. Është një investim shumë i rëndësishëm, i cili ka pasur sagën e tij, por ky investim do të zgjidhë cdo problematikë dhe do të sjellë ujë në rubinetat e cdo qytetari” tha Haxhinasto
Redaksia Online
(JavaNews.al)
