Flirti i Gianni de Biasit me kombëtaren italiane ka vënë në lëvizje edhe Federatën Shqiptare të Futbollit. Këta të fundit duket se tashmë kanë një listë me emra si pasardhës të mundshëm të teknikut italian.
Në krye të listës është emri i Besnik Hasit, trajnerit të Anderlechtit i cili pritet t’i japë lamtumirën skuadrës së tij aktuale. Mediat belge raportojnë se në tryezën e 44-vjeçarit tashmë ka disa oferta serioze, por ai është i gatshëm të refuzojë të gjitha për stolin e kombëtares shqiptare, raporton Tch.
Përveç skuadrës angleze të Aston Villa, e cila prej kohësh ka shprehur interesim për shqiptarin, në garë për shërbimet e trajnerit të Anderlechtit janë vënë edhe turqit e Trabzonspor dhe francezët e Nantes.
Mediat turke shkruajnë se tekniku gjakovar plotëson profilin e duhur për të kthyer Trabzonsporin përsëri në majat e futbollit turk dhe e rendit atë si emrin kryesor të preferencave të drejtuesve për sezonin e ardhshëm.
Planifikohet që Hasit t’i jepet fuqi e plotë vendimmarrjeje në merkato, për të ndërtuar një ekip i cili mund të luftojë për titullin kampion dhe jo vetëm për t’u renditur në zonën e Kupave të Evropës, siç ka ndodhur në sezonet e fundit.
Mirëpo, sipas mediave belge, Hasi është duke pritur një sinjal nga Shqipëria, pasi nuk dëshiron që të refuzojë për të dytën herë kombëtaren “kuqezi”, edhe pse në vjeshtën e vitit 2011 ishte skuadra e Anderlecht ajo që këmbënguli që trajneri gjakovar të qëndronte në Bruksel.
Pesë vite më pas gjërat kanë ndryshuar dhe Anderlecht nuk mund të jetë më një pengesë, pasi duket se palët kanë rënë dakord që të vazhdojnë në rrugë të ndryshme. Në rast largimi të De Biasit, vjeshta e 2016-s mund ta gjejë Hasin në stolin e kombëtares shqiptare. (B.an)
