Përplasje në distancë ka ndodhur mbrëmjen e djeshme mes dy kandidatëve për President të SHBA-ve, Kamala Harris dhe Donald Tramp (Trump).
Ky i fundit ka reaguar pas akuzave të kundërshtares së tij Harris e cila e cilësoi atë si fashist, duke theksuar se Harris ka mendje të deformuar.
“Ajo po e ngre gjithnjë e më shumë retorikën e saj, duke shkuar aq larg sa të më quajë Adolf Hitler dhe çdo gjë tjetër që i vjen në mendjen e saj të deformuar”, deklaroi Tramp.
Ky i fundit, gjatë fjalimit në Duluth (një qytet në zonën e metrosë së Atlantës në Xhorxhia), deklaroi se Harris përbën kërcënim për demokracinë.
Nga ana e saj, Harris i është kundërpërgjigjur kundërshtarit të saj duke thënë se Kongresi duhet të miratojë një ligj për legalizimin e abortit në të gjithë vendin dhe se filibusteri i Kongresit – i cili është përdorur për të penguar përpjekjet – mund të ketë nevojë të reformohet.
Harris tha se ajo beson në barazinë midis Izraelit dhe Palestinezëve dhe se të dy grupet kanë të drejtë në vendin e tyre. Ajo denoncoi gjithashtu antisemitizmin në SHBA , duke thënë se duhet të vendosen më shumë ligje për të shtuar një “parandalues” kundër krimeve të urrejtjes.
Harris tha se ajo planifikon të ulë taksat për 100 milionë amerikanë të klasës së mesme duke rritur taksat për miliarderët.
/a.r
