Presidenti Hashim Thaçi, ka ftuar nesër në takim liderët e partive politike për të diskutuar në lidhje me reformën zgjedhore por Kryetari i Aleancës për Ardhmërinë e Kosovës (AAK), Ramush Haradinaj nuk do të marrë pjesë, shkruan Gazeta Express.
Zëdhënësi i AAK’së, Muharrem Nitaj tha për Gazetën Express se Ramush Haradinaj ndodhet për një vizitë pune në Gjermani dhe për këtë arsye nuk ka mundësi të jetë i pranishëm. Nitaj nënvizoi se edhe po të ishte i pranishëm Haradinaj nuk do të merrte pjesë në takim.
” Po ka ardhur një letër e nënshkruar nga presidenti për një takim ku do të diskutohej reforma zgjedhore. Por me sa e pashe, letra është për zotin Ramush Haradinaj dhe Haradinaj aktualisht ndodhet në një vizitë pune në Gjermani dhe nuk do të jetë në këtë takim. ” tha Nitaj.
Sipas Nitajt, AAK vlerëson se tani është shumë vonë për reformë zgjedhore.
” Ajo mund të behet vetëm për zgjedhjet tjera, e jo për zgjedhjet e radhës të cilat nuk përjashtohet mundësia të mbahen brenda disa muajsh” ka shtuar ai.
Presidenti Hashim Thaçi, nesër ka ftuar për diskutim liderët e partive në orën 10 në ndërtesën e Kuvendit të Republikës së Kosovës, citohet Koha. (b.an)
