Hamas ka dorëzuar mbrëmë, 14 tetor, trupat e katër pengjeve izraelitë të vrarë, njoftoi Forca e Mbrojtjes së Izraelit (IDF), ndërsa procesi i identifikimit të viktimave është ende në zhvillim. Kryqi i Kuq i mori trupat në arkivole dhe ia dorëzoi ushtrisë izraelite.
Ky zhvillim erdhi pasi Izraeli kishte paralajmëruar se do të kufizonte ndihmat për në Gaza nëse Hamas nuk kthente trupat e të gjithë 28 pengjeve të vdekur.
Sipas Kryqit të Kuq, të martën janë kthyer në Gaza edhe 45 trupa palestinezësh.
Armëpushimi nën trysni, Izraeli kërcënon me hakmarrje
Zyra e IDF-së bëri me dije se identifikimi i katër trupave të fundit është ende në proces. Sipas planit të armëpushimit të presidentit amerikan Donald Trump, që u pranua nga të dyja palët, dorëzimi i të gjithë 48 pengjeve duhej të përfundonte të hënën në mesditë, 13 tetor.
Por ndërsa të gjithë pengjet e gjallë janë kthyer, presioni po rritet ndaj Hamasit dhe qeverisë izraelite për 20 trupat e mbetur. Zyrtarë palestinezë dhe banorët në Gaza janë shprehur të shqetësuar se vonesa e Hamasit mund të rrezikojë vazhdimësinë e armëpushimit dhe të ndezë një tjetër valë dhune.
Në një deklaratë të ashpër, IDF tha:
Hamas duhet të përmbushë pjesën e tij të marrëveshjes dhe të bëjë gjithçka që trupat e pengjeve t’u kthehen familjeve për varrim të denjë.
Ministri izraelit i mbrojtjes paralajmëroi se çdo vonesë apo shmangie e qëllimshme “do të konsiderohet shkelje e rëndë e marrëveshjes dhe do të ketë përgjigje të ashpër”.
Izraeli pezullon ndihmat dhe mbyll kalimin Rafah
Autoritetet izraelite kanë njoftuar se do të kufizojnë hyrjen e ndihmave humanitare në Gaza dhe do të shtyjnë hapjen e pikës kufitare Rafah me Egjiptin, pasi akuzojnë Hamasin për shkelje të marrëveshjes së armëpushimit.
Nga ana tjetër, Hamas ka deklaruar se ka vështirësi për të gjetur trupat e të vdekurve, duke pretenduar se disa janë ende nën rrënoja. Një kopje e marrëveshjes së armëpushimit, e publikuar nga mediat izraelite, pranon se nuk mund të gjenden të gjitha trupat e pajetë brenda afatit të parë.
Një zyrtar izraelit tha se do të krijohet një grup ndërkombëtar kërkimi për të gjetur trupat e pengjeve që ende mungojnë.
Shkrimtari nga Gaza, Tayseer Abed, e quajti situatën “një test të rrezikshëm për armëpushimin”, duke paralajmëruar se nëse vonesat vazhdojnë dhe Izraeli refuzon të ecë përpara, “çështja e trupave mund të bëhet fitili që ndez një tjetër luftë”.
Faza e parë e planit të Trumpit përfundoi, por…
Sipas marrëveshjes, rreth 2 mijë të burgosur palestinezë u liruan në këmbim të pengjeve, në kuadër të planit 20-pikësh të paqes të mbështetur nga SHBA-të. Armëpushimi hyri në fuqi më 10 tetor, në orën 12:00, por incidentet e dhunshme ende vazhdojnë.
Të martën, Skuadra e Mbrojtjes Civile Palestinë njoftoi se shtatë persona u vranë nga forcat izraelite, mes tyre pesë në një sulm me dron në lagjen Shejaiya të Gazës.
Ndërkohë, Hamas po përpiqet të rifitojë kontrollin në Gaza, por raportet për ekzekutime publike të tetë palestinezëve nga militantët e maskuar kanë shkaktuar frikë dhe zemërim në popullsi. Grupi pretendon se po “rikthen rendin dhe eliminon ligësinë”, por kritikët thonë se po përdor kaosin për të frenuar kundërshtarët politikë.
“Bordi i Paqes” dhe administrata e re për Gazën
Trump nënshkroi marrëveshjen të hënën, 13 tetor, në prani të liderëve të Egjiptit, Katarit dhe Turqisë, ndërmjetësit kryesorë të procesit. Në ceremoninë në Washington morën pjesë edhe Keir Starmer, Emmanuel Macron dhe mbi 20 liderë botërorë, përfshirë shumë vende arabe dhe myslimane.
Sipas planit, Gaza do të qeveriset përkohësisht nga një komitet palestinez teknokratësh, nën mbikëqyrjen e një “Bordi të Paqes”, përpara se pushteti t’i kalojë Autoritetit Palestinez pas reformave të kërkuara nga SHBA.
Por për të arritur në fazat e tjera të marrëveshjes, do të duhen negociata të vështira për tërheqjen e trupave izraelite, çarmatimin e Hamasit dhe të ardhmen e qeverisjes në Gaza.
Kryeministri izraelit Benjamin Netanyahu tha për CBS shpreson për “një fazë të dytë paqësore”, por theksoi se kushtet e Trumpit janë shumë të qarta:
Së pari, Hamas duhet të dorëzojë armët. Së dyti, nuk duhet të ketë më fabrika armësh apo kontrabandë në Gaza. Ky është çarmatimi.
Edhe Trump u shpreh prerë:
Ata do të çarmatosen, sepse premtuan që do ta bëjnë. Dhe nëse nuk e bëjnë vetë, do e bëjmë ne!
