Kryeministri Albin Kurti ka raportuar sot në Parlament në lidhje me rrëmbimin e tre efektivëve të policisë së Kosovës nga forcat “Kobra” të Serbisë.
Rrëmbimit të tre efektivëve të policisë së Kosovës nga forcat “Kobra” të Serbisë i është dedikuar një seancë parlamentare në Kuvendin e Kosovës, me kërkesë të opozitës.
Albin Kurti raportoi nga foltorja duke sqaruar se bëhet fjalë për një rrëmbim dhe jo arrestim siç thotë Serbia, ndërsa sqaroi duke ilustruar me një foto se efektivët kanë qenë të vendosur në territorin e Kosovës dhe jo të Serbisë, siç raporton pala tjetër.
Kryeministri i Kosovës ka deklaruar gjithashtu se një akt i tillë nga ana e Serbisë është agresion ndaj Kosovës dhe KFOR-it.
“Dy prej tyre kishin edhe probleme shëndetësore. Efektivët nuk kanë qenë pjesë e njësive elitë siç po përpiqet t’i paraqesë Serbia. Fakti që ndërkombëtarët po mobilizohen për lirimin e tyre, tregon se të gjithë e dinë që rrëmbimi është kryer në territorin tonë, ndryshe askush nuk do të fliste për lirimin e tyre. Ky është agresion ndaj republikës sonë dhe KFOR-it. Hakmarrjeve të tilla do i përgjigjemi me rend e ligj. Nuk ka as kthim pas e as nënshtrim ,” – u shpreh ai./m.j
