Ministrja e Drejtësisë, Pam Bondi, ka urdhëruar një prokuror federal të shqyrtojë mundësinë e ngritjes së akuzave penale lidhur me “komplotin ‘Russiagate’ kundër Trump”.
Nuk është ende e qartë se cilat mund të jenë akuzat dhe kush do të përballet me to, por kjo lëvizje e Bond-it vjen pas deklaratave të drejtoreshës së Inteligjencës Kombëtare, Tulsi Gabbard. Ajo publikoi muajin e kaluar dokumente me qëllim të vënies në dyshim të legjitimitetit të hetimit që dikur përcaktoi se Rusia kishte ndërhyrë në favor të Trump në zgjedhjet presidenciale të vitit 2016.
Gabbard ka akuzuar ish-presidentin Obama për tradhti të lartë dhe ka drejtuar akuza edhe ndaj ish-drejtorit të CIA-s, John Brennan, dhe ish-shefit të FBI-së, James Comey. Prokurori, emri i të cilit nuk është bërë ende publik, pritet t’i paraqesë çdo provë një jurie, e cila do të vlerësojë nëse ka bazë për ngritjen e akuzave.
Pas kësaj Trump komentoi në rrjete sociale. “E vërteta fiton gjithmonë. Ky është një lajm i madh”, tha ai.
Hetimi fillestar mbi ndërhyrjet ruse iu besua prokurorit të posaçëm, Robert Mueller, dhe çoi në dënimin e disa aleatëve të Trump, por nuk arriti të provonte një komplot kriminal mes Moskës dhe fushatës së tij elektorale.
Presidenti ka shprehur vazhdimisht zemërim për këtë që ai e ka cilësuar si një “gjueti shtrigash”, dhe së fundmi publikoi një video të krijuar me inteligjencë artificiale, ku shfaqet Obama i prangosur. Veprimi i Bond-it ka rritur shqetësimet se Departamenti i Drejtësisë mund të përdoret për hakmarrje politike.
Raportet e shërbimeve të inteligjencës dhe komisionet e Kongresit kanë studiuar përpjekjet e Rusisë për të ndikuar zgjedhjet e vitit 2016 në favor të Trump, përmes rrjedhjeve të email-eve të Partisë Demokrate dhe fushatave dezinformuese në rrjete sociale me qëllim përçarjen e opinionit publik amerikan.
Por javët e fundit, Gabbard ka deklaruar se administrata Obama kishte për qëllim të lidhte padrejtësisht Trump me Rusinë. Duke publikuar një sërë emailesh, drejtoresha e inteligjencës ka treguar se administrata Obama kishte dijeni se rusët nuk kishin hakuar pajisjet elektronike të votimit për të manipuluar rezultatet në favor të Trump. Një zëdhënës i Obamës ka kundërshtuar, duke thënë se ish-presidenti nuk ka pohuar kurrë që votat ishin manipuluar, por se ndërhyrjet kishin ndodhur në forma të tjera. Ai e ka cilësuar këtë hetim si një “shpërqendrim”, ndërkohë që debati publik vazhdon të përqendrohet tek rasti Epstein.
Javën e kaluar, republikani Chuck Grassley, kryetar i Komisionit të Drejtësisë në Senat, publikoi disa email-e që, sipas drejtorit të FBI-së, Kash Patel, vërtetojnë se “fushata e Clinton komplotonte për të rrëzuar presidentin Trump dhe për të fabrikuar mashtrimin e bashkëpunimit me Rusinë”. Këto email-e ishin pjesë e një dokumenti të klasifikuar që gjendej në raportin e John Durham, prokuror i posaçëm i emëruar gjatë mandatit të parë të Trump.
Durham identifikoi gabime të mëdha në hetimet e FBI-së, por nuk gjeti prova për të mohuar ekzistencën e ndërhyrjeve ruse në zgjedhje. Hetimi i tij prodhoi tre raste gjyqësore: dy u rrëzuan nga juria, ndërsa në të tretin, një avokat i FBI-së pranoi fajësinë për dëshmi të rreme.
Republikanët janë përqendruar tek një email i veçantë, sipas të cilit Hillary Clinton kishte miratuar një plan për ta lidhur Trump me Rusinë. Por autori i supozuar i email-it (një zyrtar i lartë pranë një organizate filantropike të themeluar nga miliarderi George Soros) dhe marrësja e tij i kanë thënë Durham-it se nuk e kanë parë kurrë atë mesazh. Edhe vetë raporti i Durham-it vëren se hetimi nuk ka mundur të konfirmojë vërtetësinë e dokumentit dhe se ai mund të ishte “një përzierje e disa email-eve të ndryshme” të marra nga hakerë rusë, gjë që lë të kuptohet se mund të jetë manipuluar nga shërbimet ruse për qëllime dezinformimi.
