Dy raste të ngjashme si ajo e vrasjes së Bledar Terpollarit sot janë ende pa autorë dhe viktimave nuk u janë gjetur kokat. Përveç këtij fakti, këto tre ngjarje, dy prej të cilave të ndodhura kohë më parë, i lidh trafiku i drogës dhe ‘hakmarrja’ e bossa-ve të drogës për t’u prerë kokën. 
ZIHNI MYDERIZI U GJET I VRARE NË KONISPOL DHE U VARROS PA KOKË
Ngjarja e parë, e cila edhe sot e kësaj dite ka mbetur pa autorë ka ndodhur më 8 tetor 2005 në Konispol. 45-vjeçari Zihni Myderizi u gjet i vrarë dhe me kokë të prerë. Trupi u gjet në vendin e quajtur “Vasilikua”, gjatë natës së 8 tetorit, ndërkohë që sipas ekspertizës vrasja kishte ndodhur në mëngjes. Viktima u varros pa kokë, e cila nuk është gjetur as sot. Mbi 10 vjet hetime për ngjarjen, dhjetra të shoqëruar nga policia, por krimi vijon të ngelet ende pa autorë. Sakaq, në hetim u përfshin policia e Sarandës, Vlorës, Antiterrori, drejtoria e Përgjithshme e Policisë së Shtetit. Viktima dyshohet se ishte përfshirë në trafik lëndësh narkotike, ndërsa vendi ku u gjet në një vend tranzit të kalimit të drogave të lehta dhe të forta. Vrasja e Myderizin konsiderohet si më misterioze në 26-vjet në Sarandë.
TRUPI PA KOKË I PAPADHATOS U GJET NË BRIGJET E KORFUZIT
Vrasja e dytë, po me të njëjtat metoda ka ndodhur më 8 janar të vitit 2010. Nga brigjet e Borshit u nis një skaf i ngarkuar me mbi 1 ton drogë, i cili drejtohej nga greku Panajotis Papadhatos, 34-vjeç, nga Zakyntho dhe shoqërues ishte 45-vjeçari nga fshati Cukë i Sarandës, Latif Balo. Skafi bashkë me drogën dhe dy personat u zhdukën. Fill pas ngjarjes, nisën kërkimet nga Shqipëria dhe Greqia për të gjetur trupat e tyre, por pa rezultat. Vetëm në nëntor 2010, në brigjet e Korfuzit del trupi i grekut Papadhatos, pa kokë. Edhe kjo ngjarje është e mbushur me mister dhe ende pa një autor.
“KRENARI I PREU KOKËN ME THIKË BLEDARIT DHE E FUTI NË ÇANTË T’JA ÇONTE BOSS-IT”
Ndërkohë, hetimet për vrasjen horror e të riut 26-vjeçar Bledar Terpollari, i cili u vra më 9 maj të këtij vitit në një fshat të Igumenicës me një plumb e më pas iu pre koha, vijojnë ende, ndërsa pas kësaj ngjarje dyshohet se fshihet kushëriri i tij, Krenar Terpollari. Dyshohet se pasi Terpollari i ka prerë kokën kushëririt të tij, ia ka çuar atë boss-it të drogës, të cilit dyshohet se Bledari i kishte 20 mijë euro.
Emiliano Nana, një pret të dyshuarve si autor dhe i arrestuar ka bërë rrëfimin e tij, që përkon me atë të Pajtim Jaupin, dhe ai i arrestuar. Emiliano rrëfen se ka qenë Krenar Terpollari, personi që i preu kokën Bledarit sepse duhet t’ia çonte bosit të kokainës. Sipas, Emilianos, Bledari kishte fshehur paratë e drogës. “Pashë njërin nga të bashkakuzuarit me mua të trokiste portën. Viktima e hapi dhe doli disa hapa jashtë kasolles dhe nisi të pyesë se çfarë duam në të tillë orë të natës. Njiheshim nga çështja e drogës dhe ai u përpoq të gjente diçka të thoshte për paratë që kishte borxh. Vrasësi e shtyu me forcë dhe u futi brenda në kasolle. Ne ishim jashtë dhe u dëgjua një e shtënë. Disa minuta më vonë e pashë të nxirrte jashtë të vdekurin dhe me nje thike qe kishte me vete i preu kokën. E pashë të fuste thikën dhe kokën ne një çante dhe ta fshehte ne portbagazh. Ikëm me makinë deri në një vend pranë kufirit. Ai tha që do të kalonte më këmbë kufirin pasi në doganë do të bëhej kontroll. Do ta conte kokën tek bossi i kokainës dhe do të merrte shpërblimin”, mbyll rrëfimin Emiliano Nana. BW
