Sesioni i ri parlamentar pritet të nisë me një sërë iniciativash, për parandalimin e fenomenit të dhunës në familje dhe ashpërsimin e dënimeve, për ata që ushtrojnë dhunë në familjet shqiptare.
Partia Demokratike pritet të çojë në Kuvend një iniciativë konkrete, për ligjin që ndalon në çdo rrethanë uljen e dënimeve për dhunë dhe vrasje në marrëdhëniet familjare dhe amnistimin e tyre. Për ish-deputeten, Mimoza Hajdarmataj vendi është në emergjencë kombëtare, për shkak të rasteve në rritje të fenomenit të dhunës në familjet shqiptare.
Krimet dhe Dhuna në Familje ka nxitur angazhimin e aktivistëve dhe ligjvënësëve për të kërkuar ndalimin e aministisë, për të dënuarit për kërcënime dhe dhunë në familje.
Mimoza Hajdarmataj: Besoj shumë që në këtë legjislaturë, Partia Demokratike do të bëjë të pamundurën që të çojë deri në fund ato nisma dhe Parlamenti është vendi ku duhet të bëhen edhe këto ligje dhe jo vetëm ligje që iu shërbejnë oligarkëve. Këtë legjislaturë besoj se gratë do të mobilizohen akoma më shumë për tu përqëndruar tek fuqizimi ekonomik i grave, pavarësimi dhe prodhimi i ligjeve që mbrojnë jetën e tyre. Është shumë e rëndësishme që ligjet të ashpërsohen, por nga ana tjetër duhet të zbatohen, pasi ligjet i kemi të bukura, por problemi qëndron tek zbatimi i tyre.
Denoncimi i dhunës në familje është shtuar, por viktimat e dhunës kanë humbur besimin tek institucionet. Përfaqësuesja e Partisë Demokratike kërkon që të rritet ndërgjegjësimi edhe në zonat rurale.
Mimoza Hajdarmataj: Unë kam parasysh shumë gra në zonat rurale që janë edhe më të pambrojtura sesa në qytetet e mëdha, ndaj them se është shumë e rëndësishme. Unë mendoj se numri në rritje i rasteve të dhunës në familje apo vrasjeve, do të thotë se vendi ëhstë në gjendje emergjence kombëtare për shkak të dhunës në rritje ndaj grave.
Partia Demokratike u angazhua të propozojë një ligj të ri që ndalon aministrinë për krimet dhe dhunën në familje. Deklarata erdhi në reagimi të ngjarjes tronditësë, ku një gjykatëse me urdhër mbrojtje u vra në Tiranë nga ish bashkëshorti, i cili ishte liruar nga burgu pas përfitimit të amnistisë./ChannelOne
