Aleanca për Mbrojtjen e Teatrit i ka adresuar në datat 12 dhe 15 Korrik dy letra Komisionerit për Zgjerimin Johanes Hahn.
Në letrat për Hahn, Aleanca kërkonte ndërhyrjen e BE për projekitin që sipas tyre shkel Kushtetutën dhe marrëveshjen e Stabilizim Asociimit Shqipëri-BE.
Pas, këtyre dy letrave, ka ardhur edhe reagimi i Komisionerit. Në emrin e tij, drejtoresha e Zgjerimit për Ballkanin Genoveva Ruiz Calavera, ëhstë përgjigjur përmes një letre ku shkruan se “kemi mbajtur shënim me interesim të madh argumentet tuaj në lidhje me vlefshmërinë e ligjit të sipërpërmendur”.
LETRA E PLOTË
Të dashur anëtarë,
Faleminderit për letrat tuaja të 12 e 15 korrikut në adresë të Komisionerit Hahn për Ligjin Special në lidhje me projektin e zhvillimit që përfshin ndërtimin e një ndërtese të re për Teatrin Kombëtar në Shqipëri.
Komisioneri më kërkoi t’ju përgjigjem në emër të tij.
Për fat të keq, për shkak të programit të tij tepër të ngjeshur, Komisioneri nuk kishte mundësi të takonte përfaqësuesit tuaj gjatë vizitës së tij në Tiranë gjatë këtij muaji.
Megjithatë, kemi mbajtur shënim me interesim të madh argumentet tuaj në lidhje me vlefshmërinë e ligjit të sipërpërmendur.
Komisioni u ka kërkuar autoriteteve shqiptare të ofrojnë informacion shtesë për Ligjin Special, me qëllimin për të parë përputhshmërinë e tij me kërkesat e Marrëveshjes së Stabilizim Asocimit midis BE dhe Shqipërisë, si dhe përputhshmërinë me rregullat e BE në fushën e ligjit të konkurrencës dhe prokurimet publike.
Pas paraqitjes së informacionit shtesë, tani Komisioni mund të procedojë me shqyrtimin e nevojshëm dhe të angazhohet në mënyrën e duhur me autoritetet.
Juaja sinqerisht,
Genovieva Ruiz Calavera
Aleanca për Mbrojtjen e Teatrit
Tiranë
Dërguar edhe zonjës Romana Vlahutin, Kryetare e Delegacionit të BE në Shqipëri
