Në rast se portieri spanjoll David De Gea do të largohet nga Manchester United, portën e “djajve” do ta mbrojë një veteran, francezi Hugo Lloris, portieri aktual i Tottenham. Lajmin e konfirmon e përditshmja britanike “The Sun”, që shprehet se United është gati të shpenzojë 30 milionë stërlina për portierin 32-vjeçar, kampion bote me Francën një vit më parë.
Manchester United pritet të arkëtojë 60-70 milionë stërlina nga shitja e De Gea, që me shumë gjasa mund të shkojë te Paris Saint Germain. Një pjesë e kësaj shume do të shkojë për portierin e ri, që çuditërisht nuk do të jetë një portier i së ardhmes, por një veteran.
Duket se trajneri Solskjaer kërkon një portier me përvojë në Premier League dhe është gati t’i ofrojë Lloris të njëjtën kontratë që ai ka aktualisht me Tottenham. Pra, një kontratë 3-vjeçare, deri në vitin 2022 (në këtë vit skadon edhe kontrata e portierit francez me Spurs). Disi e papritur kjo zgjedhje e United, që synonte një nga portierët e kombëtares angleze (Pickford).
/telesport
