Shqipëria duket se nuk është më një vend i paragjykuar nga vendet e huaja dhe këtë gjë e tregojnë dhe shifrat e viteve të fundit të turistëve që kanë ardhur duke u shtuar ndjeshëm.
Por tashmë, vendi ynë po shihet dhe si një post perfekt për të jetuar sidomos nga pensionistët italianë, shumë prej të cilëve kanë zgjedhur që me pensionin e tyre disa herë me të lartë nga moshatarët shqiptarë të bëjnë një jetë që për ta është shumë herë më e mirë se në Itali.
Corriere del Messogiorno i ka kushtuar një artikull të detajuar 75 vjeçarit Carmine Janpietro i cili prej më shumë se 10 vitesh ka vendosur që të stacionohet në Durrës bashkë me bashkëshorten e tij.
Carmine pas më shumë se 45 vitesh punë si mekanik në Puglia ka dalë në pension, por vuri re se me paratë që merrte nuk mund të bënte një jetë për të qenë.
Kështu, në vitin 2015 ai për herë të parë, mori valixhet dhe kamperin e tij për një rrugëtim që po rezulton pa kthim drejt vendit të origjinës, duke u vendosur në Durrës.
“Këtu në Shqipëri jetohet shumë mirë me pensionin italian”, tregon Karmine, i cili shton se nuk ka ardhur këtu vetëm për pjesën e taksave dhe shpenzimeve, por edhe për qetësinë që ka gjetur dhe peizazhin e mrekullueshëm.
I moshuari italian tregon se ka marrë një shtëpi në buzë të detit për vetëm 300 euro në muaj dhe fton pensionistët e tjerë nga vendi i tij që ta konsiderojnë Shqipërinë si një vend për të kaluar kohë cilësore, ku nënvizon se “një ditë më parë kishte ngrënë darkë me miqtë e tij për vetëm 15 euro, gjë që nuk ndodh në asnjë vend tjetër të botës”.
