Ish-kryeministri Sali Berisha tha nga Berati se ambasadorja amerikane Yuri Kim ka ndërhyrë në proceset gjyqësore në Shqipëri, duke shkelur konventën e diplomatëve.
Sipas Berishës Yuri Kim është përpjekur të pengojë lëvizjen e tij, të burrave dhe grave idealistë që duan të ketë pluralizëm dhe opozitë të vërtetë.
Yuri Kim është një guvernatore që s’mund të përfaqësojë Presidentin e Shteteve të Bashkuara të Amerikës, tha Berisha.
“Secili prej jush keni pësuar shantaze, ju që donit opozitë të vërtetë. Në 100 vjetorin e marrëdhënieve Shqipëri-SHBA, janë tre vetë që kanë ndikuar negativisht në këto marrëdhënie, Soros, Rama që s’ka asnjë parim as njerëzor e as shqiptar, dhe guvernatorja që i lejon vetes, e ndjen veten që mund të ndërhyjë në procese gjyqësore.
Yuri Kim thërret gazetarët dhe thotë censuroni në mënyrën më të paimagjinueshme duke shkelur Kushtetutën e vendit të saj, pse jepni Foltoren, thërret ata që bëjnë sondazhe.
Presidenti i SHBA është mik i shqiptarëve nuk mund të thotë ajo përfaqësoj Presidentin e SHBA. Ajo kur ndërhyn në gjykata, shkel konventën e diplomatëve”, tha Berisha nga Berati.
Takimi i Berishës me demokratët e Beratit u zhvillua sot në kuadër të turit elektoral të Sali Berishës, i cili kandidon për kreun e Partisë Demokratike./m.j
Kjo është dita e gjashtë e turit elektoral të Sali Berishës.
Zgjedhjet për kreun e PD-së do të zhvillohen më 22 maj, ndërsa përballë Sali Berishës është kandidati Ibsen Elezi./m.j
