Muaji gusht ka shënuar kulmin e sezonit turistik në Theth, një nga destinacionet më të vizituara të Alpeve Shqiptare. Mesatarisht, çdo natë në fshat qëndrojnë rreth 2 mijë turistë, ku pjesa më e madhe janë vizitorë të huaj.
Përveç atraksioneve natyrore si Ujëvara e Grunasit dhe Syri i Kaltër, shtegu Theth–Valbonë mbetet një nga itineraret më të preferuara nga turistët.
Vizitorë nga vende të ndryshme shprehen të mahnitur nga bukuritë natyrore të zonës.
“Vij nga Izraeli. Më pëlqen shumë. Kam qëndruar një ditë dhe është shumë tërheqëse.”
Një tjetër turist nga Izraeli tregon se e zgjodhi Thethin pasi u informua në internet.
“Kërkuam në Google dhe kështu e njohëm. Është një vend shumë i bukur. E rekomandoj. Nesër do të bëjmë ecjen për në Valbonë dhe më pas do të vazhdojmë drejt Malit të Zi.”
Një tjetër atraksion që po fiton gjithnjë e më shumë vëmendje është Zipline, i cili për të dytin vit radhazi u ofron vizitorëve një përvojë ndryshe dhe plot adrenalinë.
“Është hera e parë në Theth. Është një vend shumë i bukur dhe do të provoj zipline. Familja ime sapo e bëri, gruaja bashkë me dy fëmijët e vegjël. Po ndihem shumë i emocionuar që po e bëj këtë.”
Operatorët turistikë në zonë shprehen të kënaqur me ecurinë e sezonit. Sipas tyre, interesi për Thethin vijon të rritet, ndërsa këtë verë dominojnë turistët e huaj.
Fatmir Breishta thekson se, krahasuar me vitin e kaluar, ky sezon ka qenë më i mirë.
“Në krahasim me vitin e kaluar është një sezon shumë më i mirë. Normalisht me të huaj, jo me shqiptarë. Një përqindje shumë e vogël këtë vit ka qenë me shqiptarë. Besoj se ky sezon do të zgjasë më shumë se vitet e tjera.”
Thethi vijon të mbetet një nga perlat e turizmit shqiptar, ku natyra, aventura dhe tradita bashkohen për t’u ofruar vizitorëve një eksperiencë të veçantë në zemër të Alpeve.
