Nga Eduard Zaloshnja
Në rrugën e Qafë-Krrabës, guri kilometrik 29 ndan qarkun e Tiranës nga ai i Elbasanit. Në rrugën politike të PD-së, guri kilometrik 681-57 do të ndajë PD-në e udhëhequr prej Bashës, nga ajo e udhëhequr, deri para 4 vjetësh, prej Berishës.
Disa analistë (si Bushati, p.sh.,) e disa politikanë (si Imami e Topalli, p.sh.,) parashikojnë me siguri se PD-ja do të shkojë drejt vetëshkatërrimit. Kjo do të ndodhë, sipas tyre, falë udhëheqjes së kësaj partie nga Basha. Por demokracia, qysh në fillimet e saj (kur Klethseni shpiku votimin me gurë zalli me ngjyra të ndryshme, për zgjedhjen e udhëheqësve të Athinës së Lashtë), ka mbetur në thelb një garë numrash.
Me fjalë të tjera, në qoftë se koalicioni i PD-së udhëhequr nga Basha, merr më shumë vota ose mandate parlamentare se sa koalicioni i PD-së së udhëhequr nga Berisha më 2013, nuk mund të flitet për një vetëshkatërrim të kësaj partie. Përkundrazi, mund të flitet për një ngritje të saj.
Kështu, koalicioni prej 25 partish, që Berisha grumbulloi rreth PD-së më 2013, regjistroi gjithsej rreth 681 mijë vota në zgjedhje, duke siguruar 57 mandate parlamentare. Në qoftë se koalicioni i ngjizur prej Bashës (që do të garojë më 25 qershor nën siglën e PD-së), arrin të marrë më shumë se 681 mijë vota ose më shumë se 57 mandate, debutimi i tij si udhëheqës në zgjedhjet parlamentare mund të quhet i suksesshëm (681-shi edhe mund të mos arrihet, për shkak të një pjesëmarrje ndoshta më të ulët se e 2013-ës, që ishte rekord në çerekshekullin e fundit). Në qoftë se Basha i arrin të dyja këto objektiva, debutimi i tij mund të quhet shumë i suksesshëm. Ndërsa sigurimi i 71 mandateve nga PD-ja, është ndoshta i pamundur, falë sistemit zgjedhor aktual dhe historisë elektorale…
Në fakt, Basha e ka patur një provë gjenerale të tij si udhëheqës i një fushate elektorale kombëtare. Në zgjedhjet e 2015-ës (kur PDIU-ja ishte larguar nga koalicioni opozitar, duke iu bashkëngjitur atij mazhoritar), kandidatët që përzgjodhi Basha për kryebashkiakë morën plot 671 mijë vota – vetëm 10 mijë më pak se sa kishte marrë koalicioni i Berishës dy vjet më parë. Dhe nuk duhet harruar se në zgjedhjet lokale, zakonisht, marrin pjesë më pak zgjedhës se sa në zgjedhjet parlamentare (më 2015-ën morën pjesë 150 mijë më pak se më 2013-ën).
Me pak fjalë, në qoftë se Basha arrin rezultate më të mira se në zgjedhjet e para që udhëhoqi vetë (ato të 2015-ës), mund t’ia kalojë mentorit të tij Berisha. Gjithashtu, një rezultat mbi 681 mijë vota ose 57 mandate parlamentare (ose të dyja), do të përbënte një provë se 25 deputetët aktualë të papërfshirë në listat e reja, në fakt, nuk kanë ndonjë efekt elektoral domethënës.
Si përfundim, mund të thuhet se në 25 qershor, më shumë se me Ramën, Basha do të ketë një garë me historinë e Partisë Demokratike – me Berishën dhe me politikanët që kishte ky i fundit rreth tij në zgjedhjet e 2013-ës…
Votat në vite të koalicioneve të PD
Në grafikun e mëposhtëm paraqiten numrat e votave që kanë marrë ndër vite koalicionet e PD-së, të udhëhequra nga Berisha apo të udhëhequra nga Basha. Numri i votave për 2017-ën, bazohet në një vlerësim të përafërt të votave që mund të marrë koalicioni i partive të udhëhequra nga Basha, nisur nga një sondazh që kam kryer para disa muajsh./Afp.al
