Grupimi i anëtarëve dhe ish-anëtarëve të PD-së që kërkojnë largimin e Lulzim Bashës pas rezultatit të zgjedhjeve të 25 prillit, mbajtën një konferencë për shtyp, kur renditën disa nga arsyet e kërkesës së tyre.
Sipas grupimit “Për PD”, Lulzim Basha dhe drejtuesit e lartë të PD-së duhet të mbajnë përgjegjësi për humbjen, duke kujtuar rastin e Sali Berishës në 2013. Në deklaratë thuhet gjithashtu se rikuperimi i votave të PD-së në këto zgjedhje nuk ishte fitore pasi partia nuk garoi për të dalë forcë e dytë.
“Jemi një grupi i përbërë nga ish-drejtues të PD-së, anëtarë, simpatizantë. Mes nesh ka dhe nga Forumi Rinor i Partisë Demokratike. Grupim “Për PD” kërkon reformimin e partisë. Hapja e rrugës së reformimit vjen nëpërmjet dorëheqjes së kryetarit, kryesisë dhe mbledhjes së këshillit kombëtar, për të nisur një proces rihapje dhe riformimi nga baza deri lart.
Shqipëria u përball me zgjedhjet parlamentare të 25 prillit pas një periudhe 8-vjeçarje të një qeverisje të korruptuar që e ka çuar vendin në varfëri. Tjetërsimi i votës, përdorimi i administratës dhe përdorimi i të dhënave ishin disa elemente të strategjisë që përcaktuan rezultatin. Por ne jemi gjithashtu të vetëdijshëm se PD-ja në këto zgjedhje nuk frymëzoi dhe nuk mobilizoi qytetarët dhe nuk arriti të sigurojë mbështetje për fitore, kundër një qeverisje të lodhur nga skandalet.
Zgjedhjet e 25 prillit nuk mund të humbeshin. PS-ja dhe aleatët kanë 77 vende, opozita ka 63. Zhvendosja e votave nga LSI-ja te PD-ja nuk është fitore. PD-ja nuk po garonte për vend të dytë. Përgjegjësia për zgjedhjet është e drejtuesve të lartë të partisë. Kreu i PD-së dhe drejtuesit e lartë duhet të marrin përgjegjësitë për këtë humbje të rëndë. Sali Berisha vendosi një standard në 2013. Largimi i Bashës nuk është fundi i PD-së, por fillimi i ringritjes së saj”, tha Harxhi./ b.h
