Gripi ka shtuar vizitat në urgjencë dhe shtrimet spitalore në spitalin infektiv të qendrës spitalore universitare Nëne Tereza. Mjekët e këtij spitali thonë se pacientët vijnë me komplikacione të rënda që prekin cipën e trurit dhe mushkëritë
“Në këtë periudhë kemi një shtim të numrit të rasteve siç janë sindroma gripale të shoqëruara me komplikacione të ndryshme, qoftë encefalite d.m.th. prekje të sistemit nervor qendror, qoftë meningjit apo forma të rënda të pneumonisë që manifestohen si komplikacione të gripit gjatë kësaj periudhë. Grup moshat e prekura janë që nga 14 vjeç e deri në moshat e treta. Por ata moshat më frekuente që hasim janë ato akteve që zakonisht qëndrojnë në ambiente të hapura dhe janë aktiv në punë“, u shpreh Esi Duka, Mjeke Infeksioniste QSUT.
Një nga gabimet që po haset zakonisht tek format e rënduara thonë mjekët e infektivit janë ata që vet mjekohen duke e nisur trajtimin nga këshillat që marrin në farmaci
“Këto janë subjekte që paraqiten në forma më të rënduara sepse duke qenë se fillojnë një mjekim pa u konsultuar me një mjek ato rëndohen dhe kërkojnë më pas hospitalizim në shërbimin tonë”, tha ajo.
Mjekët vijojnë të këmbëngulin serish te vaksinimi ndaj gripit, edhe në këtë kohë virozash nëse nuk janë infektuar ende
“Vaksinimi është arma më ë mirë mbrojtëse sidomos për të sëmurët kronikë siç janë ata me hipertension arterial apo ata me diabet mellitus. Vaksinim mund të bëhen në çdo kohë, edhe tani , sidomos nëse nuk të janë shfaqur ende simptomat e gripit si temperature apo rrjedhja e hundëve të ngjashme me rrufën”, theksoi mjekja.
Sipas ISHP , në javën e dytë të janarit 36 qendrat shëndetësore në vend kanë raportuar 16 276 raste të reja me simptoma, por jo me diagnozë ose mbi 6 000 raste më shumë se java e parë. Ndërkohe 1793 raste sipas operatorit të kujdesit shëndetësor kanë rezultuar pozitiv me COVID-19 nga testet e shpejta.
