Kërcënimin e një muaji më parë, qeveria greke e ka bërë fakt. Kryebashkiakut të Himarës Jorgo Goro i është hequr nënshtetësia greke, me një vendim të firmosur nga ministri i Brendshëm grek, Panos Skurletis.
Kërcënimi ishte i hapur për të gjithë shqiptarët me nënshtetësi greke por edhe minoritarët, se nëse nuk “betohen për besnikëri ndaj Greqisë, shteti do tu hiqte nënshtetësinë”. E në fakt i tillë është edhe argumenti i dhënë për zyrtarin Jorgo Goro. Bazuar në nenin 17 të ligjit për shtetësinë greke, ajo hiqet në raste kur personi që jeton në një shtet tjetër, vepron pro atij vendi dhe kundër interesave të Greqisë, transmeton Express.
Mediat greke shkruanin një muaj më parë se Jorgo Goro në bashkëpunim me autoritetet e Shqipërisë ka shërbyer në aktivitetet e bashkatdhetarëve të tij. Më tej në shkrim thuhej:
“Shërbimet greke kanë vite që marrin informacione në lidhje me aktivitetet anti-greke të kryetarit të Himarës dhe pas rekomandimeve të përsëritura të pajtueshmërisë që kurrë nuk merren seriozisht nga zoti Goro, morëm vendimin për të hequr shtetësinë greke.”
Kryebashkiaku i Himarës, Jorgo Goro mori shtetësinë greke në vitin 2014, si dhe duket në faksmilen e mëposhtme të dokumentit të dhënies së shtetësisë.
