Greqia ka miratuar një nga programet më të mëdha të armatimit të viteve të fundit, me një vlerë që arrin deri në 3.5 miliardë euro. Athina do të blejë nga Izraeli sistemin e avancuar të mbrojtjes ajrore “Mburoja e Akilit”, i projektuar për të përballuar raketat balistike, sulmet ajrore dhe dronët. Autoritetet greke bëjnë të ditur se sistemi pritet të jetë plotësisht funksional brenda 35 muajve.
Paketa përfshin gjithashtu blerjen e dronëve amerikanë dhe izraelitë, tre avionëve transportues ushtarakë C-390 dhe 10 mini-nëndetëse britanike për operacione speciale. Sipas qeverisë greke, të paktën 25 për qind e sistemit të ri do të prodhohet nga industria vendase e mbrojtjes. Ministri i Mbrojtjes, Nikos Dendias, deklaroi se vendi ka hyrë në një epokë të re të sigurisë, me një sistem të integruar që do të mbulojë të gjithë territorin grek.
Ai theksoi se industria greke e mbrojtjes do të përfitojë investime që kalojnë vlerën e 700 milionë eurove. Ndërkohë, Athina planifikon të investojë rreth 28 miliardë euro deri në vitin 2036 për modernizimin e forcave të armatosura.
Plani përfshin edhe blerjen e avionëve luftarakë F-35 nga Shtetet e Bashkuara. Greqia vijon të rrisë shpenzimet për mbrojtjen për shkak të rivalitetit me Turqinë dhe forcimit të bashkëpunimit strategjik me Izraelin.
