Janë hapur qendrat e votimit në mbarë Greqinë prej orës 6 lokale (orës 7 në vendin tonë), për t’i thënë “Po” ose “Jo” planit të kreditorëve ndërkombëtarë. Pritet një votim i ngushtë, pasi dhe rezultatet e sondazheve thonë se shoqëria greke është e ndarë në këtë pikë. Polemika që ka shoqëruar referendumin, ka pasur si pikë kyçe kostot e tij: 40 milion euro, për shpatullat e lodhura të një vendi që nuk ka më burime financiare.
Qeveria e Ciprasit ka bëë thirrje t’i thuhet “Jo” planit të kreditorëve, kurse një pjesë tjetër e opinionit publik mendon se duke i thënë “Po” planit, vijohet me qëndrimin e vendit në Europën e Bashkuar. Duhet thënë se përpos dy kampeve, sipas sondazheve ka ende një masë të madhe njerëzish të pavendosur, të cilët me shumë gjasë do të vendosin fatin e referendumit të jetës, për Greqinë e mbytur në borxhe. Procesi i votimit mbyllet në 19, ora greke.
