Pas 40 vitesh, qytetarët grekë janë thirrur sot në referendum për të zgjedhur nëse qeveria e Greqisë do të duhet të pranojë masat shtrënguese të kreditorëve ndërkombëtarë për borxhin, ose në të kundërt rrezikon të dalë jashtë Eurozonës.
Prej orës 7 të mëngjesit, grekët u janë drejtuar kutive të votimit në referendumin e kësaj të diele për t’iu përgjigjur me “po” ose “jo” pyetjes: Duhet të miratojmë marrëveshjen që ka propozuar KE, BQE dhe FMN më 25 qershor, e cila përbëhet nga reformat për përfundimin e programit dhe nga analiza paraprake e qëndrueshmërisë së borxhit?
Qendrat e votimit u hapën në orën 07:00, ndërsa pritet të mbyllen në orën 19:00. Sipas mediave greke, rreth orës 21:00 pritet të dalin rezultatet e para. Referendumi i ditës së sotme në Greqi, i pari që prej 40 vjetësh, do të jetë një ngjarje e jashtëzakonshme në historinë e vendit. Referendumi i fundit që u mbajt në shtetin grek, ishte në vitin 1974 dhe i dha fund monarkisë duke vendosur Republikën.
Qeveria u ka bërë thirrje votuesve, që të votojnë “Jo”, për të qenë më e fuqishme në negociatat me huadhënësit, por kundërshtarët e kryeministrit Tsipras paralajmërojnë se, kjo votë mund të çojë në largimin e Greqisë nga Eurozona.
