I nxehti saharian nuk do largohet edhe aq lehtë nga Shqipëria, teksa sinoptikantët dhe specialistët paralajmërojnë kujdes me daljet gjatë kësaj fundjave, ku temperaturat parashikohen të shkojnë deri mbi 40 gradë Celcius.
Sot (8 gusht) vendi ynë parashikohet të vijojë të jetë nën ndikim të masave ajrore të qëndrueshme dhe të nxehta.
Më problem do të jenë zonat e ultësirës dhe ato bregdetare, pasi në ato malore mund të ketë edhe vranësira.
Sipas Shërbimit Meteorologjik ushtarak, Shkodra, Elbasani parashikohet të kenë temperatura maksimale deri në 41 gradë, kurse Berati, Fieri, Gjirokastra dhe Tirana me 40 gradë.
Moti parashikohet i kthjellët e vranësira të pakta deri mesatare kalimtare përgjatë relieveve malore të vendit në orët e mesditës deri ato të pasdites. Reshje shiu me intensitet kryesisht të ulët përgjatë relieveve malore të vendit në mesditë deri pasdite.
Në relievet e larta malore kryesisht në veri dhe në lindje reshjet në formën e shtrëngatave në periudha tepër afatshkurtra.
Era me drejtim nga kuadrati i perëndimit me shpejtësi mesatare deri në 6 m/s, e cila hera-herës përgjatë vijës bregdetare dhe zonave luginore pritet të fitojë shpejtësi deri në 14 m/s.
Valëzim në det të forcës 1-3 ballë.
