Pesë të arrestuarit pas grabitjes në Aeroportin e Rinasit, të cilët akuzohen për “shpërdorim detyre”, dolën paraditen e kësaj të hëne në Gjykatën e Krujës. Me kërkesë të prokurorisë, gjykata vendosi masën e sigurimit personal “arrest me burg” për shoqëruesin e vlerave monetare, Kujtim Picari, dhe drejtorin e Shërbimeve Aeroportuale, Vangjel Nikolla.
Përfaqësuesi ligjor i këtij të fundit tha se klienti i tij nuk ka përgjegjësi, duke ia lënë fajin Policisë së Shtetit.
“E vërteta është që ngjarja është natyrisht e dhimbshme, por kjo nuk do të thotë që përgjegjësia mbetet mbi të zotin e shtëpisë. Përgjegjësia është e Policisë së Shtetit, apo e qeverisë që nuk kanë marrë masat për të mbrojtur territorin e jashtëm të aeroportit”, tha Vladimir Meçe, avokat.
Ndërkohë, për shefin e stacionit të kompanisë “ICTS”, Arben Karafili, dhe dy agjentët patrullë, Bledar Blloshmi dhe Fadil Jonuzaj, masat do të caktohen nga një tjetër gjyqtare. Vendimi u mor pasi gjyqtarja Enkeleda Hoxha u tërhoq për shkak të konfliktit të interesit, pasi 3 të pandehurit mbrohen nga avokati Fatmir Braka, me të cilin gjytarja ishte palë në një proces civil.
