Korrieri i Prokurorisë së Durrësit, është sulmuar paraditen e të martës nga dy persona të paidentifikuar që i kanë marrë me forcë disa prej materialeve që ai kishte marrë nga posta.
Në një njoftim paraprak policia e Durrësit thotë se ngjarja ndodhi pranë zyrave të postës në Durrës, mes orës 10.30-11.00 të mëngjesit.
Shtetasi I.K., me punë korrier pranë Prokurorisë së Rrethit Gjyqësor Durrës është sulmuar nga dy persona të paidentifikuar , të cilët i kanë marrë disa materiale që i kishte tërhequr nga Posta”, thuhet në njoftimin e policisë.
Koordinatorja për mediat pranë Prokurorisë së Rrethit Durrës Borana Gjidiaj i tha BIRN se në materialet e grabitura nuk kishte informacione të rëndësishme.
“Nuk ka informacion me rëndësi dhe nuk janë informacione sekret hetimor. Është postë që ka të bëjë me korrespondencën me institucione të treta”, tha Gjidiaj.
Ajo tha se prokuroria kishte ngritur menjeherë një grup hetimorë për ngjarjen, ndërsa policia njoftoi se ende po punohej për të zbuluar identitetin e autorëve dhe rrethanat e ngjarjes.
a.ç
