Lënia në qeli e shefit të sigurisë së bankës së vjedhur gjatë fundjavës, shkaktoi dje momente nervozizmi te të afërmit e tij.
Motra e tij, e pranishme në sallë gjatë shpalljes së vendimit, iu drejtua gjyqtares me fjalën: “Çfarë bën moj?! Çfarë bën?!”. Ajo tentoi të afrohej te gjyqtarja, duke shkelur pak hapa në territor të ndaluar për publikun, por punonjësit e sallës së gjyqit e penguan duke e sprapsur.
“Kështu e kanë këta, lirojnë kriminelët dhe lënë të pafajshmit”, tha një tjetër nga familjarët, teksa po shoqëronte motrën e të arrestuarit jashtë sallës. U bë e ditur se gjatë shqyrtimit të masës së sigurisë, mbrojtësi i Skarrës kërkoi masë më të lehtë se “arresti në burg”, duke argumentuar veç të tjerash se klienti i tij ishte babai i një fëmije të mitur dhe se bashkëshortja ishte shtatzënë.
Kërkesa nuk u mor parasysh nga Gjykata, e cila e izoloi të dyshuarin Skarra në “arrest në burg”. Në seancë kanë ndërhyrë punonjësit e Gjykatës, të cilët e kanë shoqëruar qytetaren drejt daljes për nga salla e gjyqit.
Nga ana tjetër, edhe vetë gjyqtarja, e ndodhur nën reagimin e motrës së të arrestuarit, ka kërkuar ndërhyrjen e punonjësve që menaxhojnë seancat me qëllim shmangien e incidentit.
Motra e shefit të sigurisë së bankës është parë teksa qante në momentin që iu drejtua gjyqtares, por edhe në kohën kur po largohej nga seanca gjyqësore.
