Një ekip nga Ministria e Ekonomisë, Kulturës dhe Inovacionit, kryesuar nga zëvendësministrja Lira Pipa, inspektoi punimet në kantierin e rikonstruksionit të Teatrit “Aleksandër Moisiu”, një nga institucionet më emblematike të jetës artistike në qytetin bregdetar të Durrësit.
Në inspektim ishin të pranishëm edhe përfaqësues të Bashkisë Durrës.
Ministri Gonxhja, në një publikim në rrjetet sociale tha se, ky investim strategjik i bashkëfinancuar nga Ministria e Ekonomisë, Kulturës dhe Inovacionit është pjesë e një vizioni më të gjerë për forcimin e infrastrukturës kulturore, si motor zhvillimi për komunitetin dhe qytetin.
Rikonstruksioni i Teatrit të Durrësit synon jo vetëm përmirësimin e kushteve teknike dhe funksionale, skenën moderne etj., por mbi të gjitha ringritjen e tij si një hapësirë gjallëruese për krijimtarinë, dialogun dhe edukimin artistik të brezave të rinj.
“Ky projekt ambicioz përpiqet të komunikojë imazhin e një qyteti në lëvizje, aktiv dhe inovativ, i cili respekton trashëgiminë e tij kulturore, duke ndërtuar mbi të një të ardhme të qëndrueshme dhe cilësore”, u shpreh kreu i MEKI-t, Blendi Gonxhja.
