Ministri i Drejtësisë, Toni Gogu, së bashku me Ministren e Arsimit dhe drejtuesen politike të qarkut, Mirela Kumbaro, si dhe Kryebashkiakun Flamur Golemi, zhvilluan një takim me profesionistë të ligjit në Gjirokastër, në kuadër të turit “Punët e Shqipërisë”.
Në fokus ishin “Punët e Drejtësisë” dhe roli i saj në zhvillimin ekonomik e shoqëror.
Në fjalën e tij, ministri Gogu theksoi se drejtësia është “infrastruktura që nuk shihet, por që mban në këmbë çdo sektor të zhvillimit”.
Ai nënvizoi se pa siguri ligjore nuk mund të ketë turizëm të qëndrueshëm dhe as mbrojtje efektive të trashëgimisë kulturore.
“Nuk mund të bëjmë turizëm pa siguri ligjore, as për turistët dhe as për mikpritësit. Nuk mund të mbrojmë trashëgiminë tonë kulturore pa e mbrojtur atë me ligj,” u shpreh Gogu.
Ministri pranoi se punët e drejtësisë janë ende të papërsosura, por disa shërbime po japin rezultate konkrete, si Ndihma Juridike Falas,
Përmbarimi Shtetëror dhe Shërbimi i Provës, të cilat kanë rritur aksesin e qytetarëve në drejtësi dhe zbatimin e vendimeve.
Ai e cilësoi reformën në drejtësi si një proces 10-vjeçar që ka sjellë ndryshime thelbësore, duke përmendur ndarjen përfundimtare të politikës nga drejtësia, fundin e pandëshkueshmërisë dhe ndërtimin e një sistemi të pavarur, arritje që njihen edhe ndërkombëtarisht.
Gogu bëri të ditur se Shqipëria ndodhet në një moment kyç të procesit të integrimit europian, duke shtuar se pritet së shpejti një vlerësim pozitiv për mbylljen e piketave të ndërmjetme dhe kalimin në fazën e mbylljes së kapitujve të negociatave.
“Ky nuk është rezultat i 18 muajve, por i 10 viteve punë të të gjithë shtetit shqiptar,” tha ai, duke shtuar se objektivi është përmbyllja e një pjese të konsiderueshme të kapitujve brenda këtij viti.
