Protagonistët e rubrikës “Shihemi në Gjyq” në Tv Klan, Miranda dhe Xhezmiu që janë bashkëshortë prej 30 vjetësh, pretendojnë të nxjerrin palën përballë nga shtëpia.
E para e merr fjalën është Miranda e cila i referohet ashpër burrit të saj duke thënë: “Jeta ime ka filluar që ditën e parë të martesës me këtë gogol mund ta quaj se burrë nuk mund ta quaj kurrë!” Pas kësaj, ajo vazhdon ta sulmojë me fjalë Xhezmiun dhe tregon se ajo ka rritur dy fëmijët nga martesa e tij e parë, por sot ndodhet jashtë.
Xhezmiu ka kaluar një sërë vështirësish shëndetësore, por Eni Çobani shpjegon se janë marrë masat dhe miratimi i mjekut që ai mund të marrë pjesë në këtë seancë.
Miranda: Në ’95 jam martuar me… çfarë mund t’i them, me babanë e fëmijëve të mi se burrë s’është kurrë ai. S’ka qenë asnjë ditë, jo burrë.
Eni Çobani: Burrë ose jo, ju keni bërë dy fëmijë me të, patjetër që ka qenë burrë që keni bërë dy fëmijë.
Miranda: Nga martesa e parë ka dy fëmijë.
Eni Çobani: Ah, ju jeni martesa e dytë me z. Xhezmi.
Miranda: Kam marrë burrë me dy fëmijë.
Eni Çobani: Dhe këto dy fëmijë kanë qenë prezent në jetën tuaj?
Miranda: I kam gjetur të vegjël dhe i kam rritur unë, i kam ndjekur unë me shkollë, nëpër spitale, nëpër të gjitha, fëmijët e atij që shikon aty. I kam rritur unë.
Xhezmi: Po pse moj, ç’të keqe të kam bërë unë ty?
Miranda: Ti po, më ke nxjerrë me fëmijët përjashta! Kam punuar një jetë të tërë që ditën e parë që kam vajtur!
Xhezmi: Ti erdhe pa dhëmbë në gojë, u bëre njeri atje! Shkollën ta dhashë, të gjitha!
Miranda: Shkollën ma dhe, por ishte zgjuarsia ime.
